Rannsakendur frá Lúxemborg yfirheyrðu menn á Íslandi

Lögregluyfirvöld í Lúxemborg sendu þrjá menn hingað til lands í lok desember vegna Lindsor-málsins svokallaða. Þeir yfirheyrðu Íslendinga sem tengjast málinu. Það snýst um lán sem Kaupþing veitti sama dag og Geir H. Haarde bað guð að blessa Ísland.

Þrír menn sem vinna við rannsókn á Lindsor-málinu svokallaða komu til Íslands í desember síðastliðnum, lögðu fram réttarbeiðni og óskuðu eftir atbeina embættis héraðssaksóknara vegna rannsóknar málsins. Í kjölfarið yfirheyrðu þeir Íslendinga sem tengjast málinu, samkvæmt heimildum Kjarnans. Einn þeirra sem kom hingað til lands er rannsóknardómarinn sem stýrir rannsókninni, Ernest Nilles

Lindsor-málið hefur verið til rannsóknar í á níunda ár, bæði hjá yfirvöldum á Íslandi og í Lúxemborg. Lögregluyfirvöld í Lúxemborg yfir­heyrðu menn ytra í tengslum við rann­sókn á því í mars 2015. Á meðal þeirra sem yfir­heyrðir voru eru íslenskir rík­is­borg­ar­ar.

Rann­sókn máls­ins er enn opin hjá yfir­völdum í báðum lönd­unum þótt hún engar ákærður hafi verið gefnar út í því. Þeir sem eru grun­aðir um lög­brot í mál­inu, fyrr­ver­andi helstu stjórn­endur Kaup­þings og vild­ar­við­skipta­vinur þeirra, hafa ávallt harð­neitað að nokkuð sak­næmt hafi átt sér stað í mál­inu.

Þegar málflutningur í svokölluðu CLN-máli fór fram í desember 2015 fjallaði Hreiðar Már Sigurðsson, fyrrverandi forstjóri Kaupþings og einn sakborninga í því máli, um Lindsor-málið í ræðu. Í ræðu sinni sagði Hreiðar Már að Lindsor-málið hafi snúist um endurkaup á skuldabréfum sem Kaupþing hafði áður gefið út á alþjóðlegum skuldabréfamörkuðum. Hann sagði að kaupin hafi verið gerð í „samræmi við ráðleggingu Deutsche Bank og með þeim kaupum minnkuðum við endurfjármögnunarþörf bankans og högnuðumst með því að kaupa til baka skuldabréf á afföllum.“

Lán veitt 6. október 2008

Lindsor-málið snýst meðal annars um lán upp á 171 milljónir evra, 20,5 milljarða króna á gengi dagsins í dag, sem Kaupþing veitti félagi sem heitir Lindsor Holding Corporation og er skráð til heim­ilis á Tortóla-eyju. Lindsor var í eigu Otris, félags sem stjórn­endur Kaup­þings stýrðu og virk­aði sem nokk­urs konar afskrifta­sjóður utan efna­hags­reikn­ings Kaup­þings.

Auglýsing

Lánið var veitt 6. októ­ber 2008, sama dag og neyðarlög voru sett á Íslandi og Geir H. Haarde, þáver­andi for­sæt­is­ráð­herra, bað guð að blessa Ísland. Þann dag lánað Seðla­banki Íslands líka Kaup­þingi  500 millj­ónir evra í neyð­ar­lán. Þremur dögum síðar var Kaup­þing fall­inn.

Lánið til Lindsor var aldrei borið undir lána­nefnd Kaup­þings. Það var notað til að kaupa skulda­bréf af Kaup­þingi í Lúxemborg, ein­stökum starfs­mönnum þess banka og félagi í eigu Skúla Þor­valds­son­ar, vild­ar­við­skipta­vinar Kaup­þings.

Í grein­ar­gerð sér­staks sak­sókn­ara sem fylgdi gæslu­varð­halds­úr­skurði yfir Magn­úsi Guð­munds­syni, fyrrum for­stjóra Kaup­þings í Lúxemborg, í maí 2010, segir að „til­gangur við­skipt­anna hafi verið sá að flytja áhætt­una af fallandi verð­gildi skulda­bréf­anna af eig­end­um þeirra og yfir á Kaup­þing á Ísland­i“. Þar sagði einnig að gögn bendi til þess að Lindsor hafi keypt skulda­bréfin á mun hærra verði en mark­aðs­verði.

Hreiðar Már Sigurðsson hefur ávallt hafnað því að nokkur innan Kaupþings hafi hagnast vegna neyðarláns Kaupþings.

Þegar Kaup­þing féll þremur dögum eftir kaupin á bréf­unum var ljóst að Lindsor gat ekki greitt lánið til baka, enda eina eign félags­ins verð­litlu skulda­bréfin sem félagið hafði keypt þremur dögum áður. Engar trygg­ingar voru veittar fyrir lán­inu. Þeir sem seldu bréfin los­uðu sig hins vegar undan ábyrgðum og rannsóknaraðilar telja að þeir hafi um leið tryggt sér mikinn ágóða.

Hafna því að hafa hagnast um eina evru

Þessu hafa Kauþingsmenn alltaf hafnað. Hreiðar Már sagði í grein sem hann skrifaði síðla árs 2014 að ekkert af fjármagninu frá sem Kaupþing fékk frá Seðlabankanum hafi verið notað til að kaupa eigin skuldabréf Kaupþings. „Allt fjármagnið var nýtt til að tryggja aðgang viðskiptavina bankans í fjölmörgum löndum Evrópu að bankainnistæðum sínum, tryggja aðgang dótturbanka Kaupþings í Evrópu að lausafé og mæta veðköllum bankans vegna fjármögnunar hans og viðskiptavina hans á verðbréfum hjá alþjóðlegum bönkum í Evrópu.[...]Enginn eigandi, viðskiptavinur, stjórnandi eða starfsmaður bankans hagnaðist um svo mikið sem um eina evru vegna láns Seðlabanka Íslands. Engar óeðlilegar fjármagnshreyfingar áttu sér stað með andvirði lánsins og starfsmenn Kaupþings sem komu að ráðstöfun lánsins gengu til sinna starfa af heiðarleika.“

Meira eftir höfundinnÞórður Snær Júlíusson
Meira úr sama flokkiFréttaskýringar