Íslend­ingar seldu þjón­ustu til útlanda fyrir 498,4 millj­arða króna í fyrra en keyptu þjón­ustu fyrir 363,6 millj­arða króna. Því var afgangur af þjón­ustu­við­skiptum Íslend­inga árið 2014 alls 134,8 millj­arðar króna. Þetta kemur fram í nýjum tölum Hag­stofu Íslands sem birtar voru í morgun.

Sala á þjón­ustu til ferða­manna er eðli­lega fyr­ir­ferð­ar­mest í þjón­ustu­við­skiptum þjóð­ar­inn­ar. Sala á sam­göngu- og flutn­ings­þjón­ustu var 189,2 millj­arðar króna (38 pró­sent af heild­ar­út­flutn­ingi) og sala á ferða­þjón­ustu nam  159 millj­örðum króna (31,9 pró­sent af heild­ar­út­flutn­ing­i). Athygli vekur að tekjur Íslend­inga vegna flutn­inga standa nán­ast í stað á milli ára á meðan að tekjur vegna seldrar ferða­þjón­ustu juk­ust um 28 millj­arða króna milli ára. Ástæðan er að öllum lík­indum sú að mun fleiri flug­fé­lög fljúga nú til Íslands en áður. Sú aukna tíðni skilar fleiri ferða­mönnum hingað til lands en ekki auknum tekjum fyrir íslensk flug­fé­lög.

Íslend­ingar keyptu mest að ferða­þjón­ustu frá útlöndum í fyrra, alls fyrir 113,6 millj­arða króna (31,2 pró­sent af heild­ar­inn­flutn­ing­i). Það er aukn­ing upp á um tíu millj­arða króna milli ára.

Afgangur tvö­fald­að­ist á milli ára

Langstærsti hluti þjón­ustu­við­skipta okkar er við lönd innan Evr­ópu­sam­bands­ins. Alls var 48 pró­sent af útfluttri þjón­ustu okkar til þeirra og 61,2 pró­sent af inn­fluttri þjón­ustu. Stærstu þjón­ustu­við­skipta­lönd okkar eru sem fyrr Bret­land, Banda­ríkin og Dan­mörk.

Hin góði afgangur af þjón­ustu­við­skiptum hefur haldið áfram á þessu ári. Á öðrum árs­fjórð­ungi árs­ins 2015 var hann jákvæður um 54,7 millj­arða króna. Ferða­þjón­usta var stærsti lið­ur­inn í inn- og útflutn­ingi á árs­fjórð­ungn­um. Útflutt ferða­þjón­usta var 54,6 millj­arðar króna á meðan inn­flutt ferða­þjón­usta nam 34,1 millj­arði króna. Afgangur hennar nam því 20,4 millj­örðum króna. Afgangur á sama árs­fjórð­ungi árið 2014 nam 11,2 millj­örðum króna og því ljóst að hagn­aður Íslend­inga af ferða­þjón­ustu á öðrum árs­fjórð­ungi nærri tvö­fald­að­ist milli ára.

Vöru­skipti nei­kvæð

Hinn mikli afgangur af þjón­ustu­við­skiptum gerir það að verkum að við­skipta­jöfn­uður Íslend­inga verður jákvæð­ur, en vöru­skipti við útlönd hafa verið nei­kvæð það sem af er ári um 6,4 millj­arða króna. Á fyrstu sjö mán­uðum árs­ins fluttu Íslend­ingar inn  vörur fyrir 391,5 millj­arða króna en út fyrir um 385,2 millj­arða króna. Á sama tíma árið 2014 voru vöru­skiptin óhag­stæð um 7,6 millj­arða króna. Vert er að hafa í huga að stórar fjár­fest­ingar íslenskra fyr­ir­tækja hafa haft tölu­verð áhrif á aukn­ingu í inn­flutn­ingi. Alls er inn­flutn­ingur á fyrstu sjö mán­uðum árs­ins 17,2 pró­sent meiri en hann var á sama tíma­bili í fyrra vegna hrá- og rekstr­ar­vöru og kaupa á flug­vél­um.

Iðn­að­ar­vörur eru 54,2 pró­sent alls útflutn­ings það sem af er ári og er verð­mæti þerira 24,8 pró­sent hærra en árið áður. Þar skiptir útflutn­ingur á áli mestu. Sjáv­ar­af­urðir hafa alls verið 41,6 pró­sent vöru­út­flutn­ings og verð­mæti þeirra hefur verið 19,3 pró­sent hærra en í fyrra, aðal­lega vegna útflutn­ings á fiski­mjöli.