Umræðum um fjár­laga­frum­varpið verður haldið áfram eftir helgi, von­andi á mánu­dag, segir Einar K. Guð­finns­son, for­seti Alþing­is. Þá mun hefj­ast önnur umræða um frum­varp­ið, en hún átti sam­kvæmt starfs­á­ætlun þings­ins að fara fram þann 26. nóv­em­ber síð­ast­lið­inn. Á mánu­dag verður því komin 12 daga seinkun á starfs­á­ætl­un­inn­i. 

Árni Páll Árna­son, for­maður Sam­fylk­ing­ar­inn­ar, vakti athygli á því á Alþingi í dag að meiri­hluti fjár­laga­nefndar Alþingis væri ekki búin að skila af sér breyt­ing­ar­til­lögum sínum fyrir aðra umræðu fjár­lag­anna. „Þriðja umræða fjár­laga átti að fara fram í gær og maður spyr sig: Hvað veld­ur?“ Árni Páll sagði ótrú­legan skort á verk­stjórn af hálfu for­ystu fjár­laga­nefndar og rík­is­stjórn­ar­inn­ar. „Ég verð því að spyrja virðu­legan for­seta: Hvenær getur þá önnur umræða fjár­laga farið fram og mun for­seti ekki fara að tryggja það að for­usta fjár­laga­nefndar hætti að móðga fólk úti í bæ og fari að vinna vinn­una sína?“ 

Það er löngu orðið ljóst að komin sé seinkun á þing­störf­in, líkt og oft ger­ist á þessum tíma, enda eru aðeins þrír dagar eftir af þing­inu samkvæmt starfs­á­ætl­un.Vig­dís Hauks­dótt­ir, for­maður fjár­laga­nefnd­ar, sagði í sam­tali við Kjarn­ann þegar þetta var orðið ljóst að hún væri „al­gjör­lega óstressuð yfir því“ að seinkun væri komin á afgreiðslu fjár­laga. Hún sagði það vera til þess fallið að skapa úlfúð þegar rætt væri um að umræður muni ekki stand­ast starfs­á­ætlun þings­ins og stjórn­ar­and­staðan hugsi ekki um dag­skrá þings­ins þegar hún stund­aði mál­þóf. 

Stjórn­ar­frum­vörpum fjölg­að 

Eins og fram kom í frétta­skýr­ingu Kjarn­ans í nóv­em­ber hafði rík­is­stjórnin aðeins lagt fram 25 stjórn­ar­frum­vörp þann 23. nóv­em­ber. Aldrei á þess­ari öld hafði rík­is­stjórn lagt fram eins fá mál þegar svo langt var liðið á haust­þing. Síðan þá hefur rík­is­stjórnin hins vegar lagt fram 20 stjórn­ar­frum­vörp til við­bót­ar, svo málin eru alls 45. Sex eru orðin að lög­um, tíu bíða enn fyrstu umræðu á meðan 21 er í nefnd eftir fyrstu umræðu. Tvö frum­vörp hafa verið afgreidd úr nefnd og bíða ann­arrar umræðu, þrjú eru í nefnd eftir aðra umræðu og þrjú bíða þriðju og síð­ustu umræð­u.