Sigríður Benediktsdóttir framkvæmdastjóri fjármálastöðugleika í Seðlabanka Íslands lætur af störfum 1. október næstkomandi en henni hefur boðist starf hjá Yale-háskóla í Bandaríkjunum þar sem hún mun sinna rannsóknum og kennslu. Þetta kemur fram í fréttatilkynningu frá Seðlabanka Íslands. Starf framkvæmdastjóra fjármálastöðugleika verður auglýst laust til umsóknar innan tíðar.
Sigríður starfaði áður við Yale á árunum 2007-2012, þó með hléi á árunum 2009-2010 þegar hún sat í rannsóknarnefnd Alþingis um aðdraganda og orsakir falls íslensku bankanna árið 2008.
„Sigríður tók við starfi framkvæmdastjóra fjármálastöðugleika í Seðlabankanum 1. janúar 2012. Meginviðfangsefni sviðsins eru í greining og mat á kerfisáhættu og fjármálastöðugleika ásamt þátttöku í mótun varúðarreglna fyrir fjármálakerfið. Hún hefur einnig setið í kerfisáhætturáði Danmerkur frá ársbyrjun 2013. Sigríður kom til starfa í Seðlabankanum á tíma þegar unnið var að innleiðingu nýs regluverks um fjármálastarfsemi og nýs ramma um vöku yfir áhættu í fjármálakerfinu. Af þessu tilefni vill Már Guðmundsson seðlabankastjóri taka fram að Sigríður hafi lagt mjög mikið til þessarar vinnu og þar hafi nýst mikil þekking hennar og reynsla,“ segir í tilkynningu frá Seðlabanka Íslands.
