Frétta­stofa RÚV krefst þess að Vig­dís Hauks­dóttir dragi órök­studdar og ósannar ásak­anir sínar til baka, en Vig­dís sak­aði RÚV og Kast­ljós um að vilja kné­setja íslenskan land­búnað og falsa myndir sem birt­ust í Kast­ljóssumfjöllun um Brú­negg í gær­kvöld­i. 

„Það er óvið­un­andi að hafður sé uppi slíkur atvinnurógur í garð frétta­manna sem sinna sínum störfum af heil­indum og fag­mennsku,“ segir í yfir­lýs­ingu frá Kast­ljósi, sem Þóra Arn­órs­dótt­ir, rit­stjóri Kast­ljóss og Rakel Þor­bergs­dótt­ir, frétta­stjóri RÚV, skrifa báðar undir ásamt þeim frétta- og dag­skrár­gerð­ar­mönnum sem fjöll­uðu um mál­efni Brú­neggja í gær. 

„Vig­dís Hauks­dótt­ir, fyrr­ver­andi for­maður fjár­laga­nefnd­ar, heldur því fram á Face­book­síðu sinni að Kast­ljós sé „þekkt fyrir að falsa myndir með umfjöll­un“, án þess að nefna um það dæmi, enda eru þau ekki til,“ segir í yfir­lýs­ing­unni. Vig­dís sé að gefa í skyn að myndir sem hér­aðs­dýra­læknir Vest­ur­lands tók og voru birtar í Kast­ljósi í gær séu fals­að­ar. 

„Kast­ljós fékk aðgang að skoð­un­ar­skýrslum frá Mat­væla­stofnun í krafti upp­lýs­inga­laga og þeim ljós­myndum og mynd­böndum sem fylgdu skýrsl­un­um. Í þætt­inum voru þær myndir ein­göngu sýndar með frá­sögn af þeim heim­sókn­um. Það er óvið­un­andi að hafður sé uppi slíkur atvinnurógur í garð frétta­manna sem sinna sínum störfum af heil­indum og fag­mennsku. Ummæli þing­manns­ins fyrr­ver­andi vega alvar­lega að æru og starfs­heiðri frétta­manna RÚV og við það verður ekki unað. Frétta­stofa RÚV krefst þess að Vig­dís Hauks­dóttir dragi órök­studdar og ósannar ásak­anir sínar til bak­a.“ 

Í sömu færslu á Face­book sagð­ist Vig­dís hafa heim­ildir fyrir því að starfs­menn RÚV séu 700 tals­ins með verk­tök­um. Þetta leið­réttir RÚV og segir að fjöldi stöðu­gilda sé 259 auk verk­taka í stærri tíma­bundnum verk­efni en hlut­fall þeirra fram­lags fari aldrei yfir 25% vinnu starfs­manna.