Gert er ráð fyrir 28,4 milljarða króna afgangi af rekstri ríkissjóðs á árinu 2017, samkvæmt fjárlagafrumvarpi sem lagt var fram í dag. Heildartekjur verða 772 milljarðar króna en útgjöld 743,4 milljarðar króna.
Heildarskuldir ríkissjóðs eru áætlaðar 39 prósent af vergri landsframleiðslu í lok næsta ár og hafa þá lækkað úr 60 prósent hennar í árslok 2015. Stefnt er að því samkvæmt ríkisfjármálaáætlun að skuldir ríkissjóðs verði 29 prósent af vergri landsframleiðslu árið 2021.
Vaxtagjöld ríkissjóðs halda áfram að lækka umtalsvert samkvæmt frumvarpinu. Árið 2015 greiddi hann 79 milljarða króna í vexti af skuldum sínum en sú tala á að fara niður í 69 milljarða króna á næsta ári.
Frumvarpið er lagt fram við sérkennilegar aðstæður í ár. Einungis nokkrar vikur eru til áramóta og enn á eftir að mynda ríkisstjórn eftir kosningarnar sem fóru fram 29. október síðastliðinn. Því er það starfsstjórn Sjálfstæðisflokks og Framsóknarflokks, sem hefur ekki lengur meirihluta á Alþingi, sem leggur fram frumvarpið. Það er byggt á þegar samþykktri fjármálastefnu áranna 2017-2021 sem samþykkt var í ágúst síðastliðnum. Til viðbótar er að finna í frumvarpinu fjárhagsáhrif nýrra laga sem Alþingi hefur samþykkt, kostnað vegna ákvarðana sem ríkisstjórnin tók um nokkur ný málefni rétt fyrir kosningar og annarra áætlaðra útgjaldabreytinga sem ríkissjóður er að óbreyttu skuldbundinn til að fjármagna.
Ýmis konar útgjaldaaukningar
Helstu útgjaldamál í frumvarpinu eru þær að breytingar á lögum um almannatryggingar sem munu kalla á 11,1 milljarða króna útgjaldaaukningu. Aukin rekstrargjöld til heilbrigðismála nema 7,3 milljörðum króna, hækkun iðgjalda launagreiðenda til A-deildar Lífeyrissjóðs starfsmanna ríkisins (LSR) úr 11,5 prósentum í 15,1 prósent frá og með næstu áramótum mun kosta 4,5 milljarða króna og aukning til mennta- og menningarmála mun kosta 2,5 milljarða króna. Þá mun nýr rammasamningur um almenn starfsskilyrði landbúnaðarins, svokallaður búvörusamningur, kosta 1,1 milljarð króna í útgjaldaaukningu. Nýtt húsnæðisbótakerfi mun kalla á aukin framlög upp á 785 milljónir króna og heildarkostnaður vegna kerfisins er áætlaður 6,5 milljarðar króna á næsta ári. Þá er áætla að byggðar- og sóknaráætlanir landshluta muni kosta 500 milljónum krónum meira en áður.
Þá koma til ný og aukin fjárfestingar- og framkvæmdaverkefni í fjárlagafrumvarpi 2017 til samræmis við fjárfestingarsvigrúm fjármálaáætlunar. Á meðal þeirra eru framlög vegna bygginga þriggja nýrra hjúkrunarheimila á árunum 2016-2018 (1,2 milljarðar króna), bygging nýrrar Vestmannaeyjaferju (1,1 milljarður króna) og aukin framlög til vegamála (um einn milljarður króna).
