Meðalverð á rafmagni sem sölufyrirtæki rafmagns kaupa af Landsvirkjum og selja til heimila og fyrirtækja mun lækka um 2,6 prósent á föstu verðlagi á næsta ári. Ástæðan eru nýir samningar sem Landsvirkjun hefur gert við fyrirtækin sem fela í sér bætta nýtingu á orkuauðlindum landsins með aflsparnaði og tækifæri til hagræðingar og bættra innkaupa hjá orkufyrirtækjunum. Sölufyrirtækin sem um ræðir eru Orkusalan, Orka náttúrunnar, HS Orka, Fallorka, Orkubú Vestfjarða og Rafveita Reyðarfjarðar.
Þetta þarf ekki endilega að þýða að rafmagnsreikningur heimila og smærri fyrirtækja í landinu lækki, heldur þýðir þetta einfaldlega að verðið frá heildsalanum, Landsvirkjun, til smásalans, ofangreindra fyrirtækja, lækkar. Það er síðan sölufyrirtækjanna að ákveða hvort að sú lækkun skilar sér til notenda.
Gömlu samningarnir renna út um áramót
Landsvirkjun er langstærsti framleiðandi rafmagns á Íslandi. Um 80 prósent af öllu rafmagni sem það framleiðir er selt til stórnotenda á borð við álver og annarra stóriðjuvera. Um 20 prósent af rafmagnssölu Landsvirkjunar er hins vegar seld á heildsölumarkaði þar sem Landsvirkjun selur ekki rafmagn beint til heimila eða smærri fyrirtækja. Þau fyrirtæki sem kaupa rafmagnið á þeim markaði selja það svo áfram til endanotenda.
Landsvirkjun hélt fréttamannafund í dag þar sem Hörður Arnarson, forstjóri fyrirtækisins, og Björgvin Skúli Sigurðsson, framkvæmdastjóri markaðs- og viðskiptaþróunarsviðs, kynntu nýtt fyrirkomulag samninga Landsvirkjunar við sölufyrirtæki rafmagns sem taka gildi um komandi áramót. Nýju samningarnir lesa af hólmi samninga sem eldra fyrirkomulag þar sem gert var í kjölfar þess að ný raforkulög voru sett árið 2005. Um var að ræða samningar við sex sölufyrirtæki og voru samningarnir til eins, fimm, sjö og tólf ára. Þeir lengstu eru því að renna út um komandi áramót.
Breytt fyrirkomulag
Í tilkynningu frá Landsvirkjun vegna málsins segir: „Með nýju fyrirkomulagi samninga þurfa sölufyrirtækin ekki lengur að binda aflkaup sín yfir heilt ár í senn. Rafmagnsnotkun er að jafnaði minni yfir sumarmánuðina og því geta sölufyrirtækin náð verulegri hagræðingu í innkaupum sínum með því að kaupa minna afl á þeim tíma. Landsvirkjun getur nýtt tækifærið og skipulagt viðhaldsverkefni betur en áður og selt afl með styttri fyrirvara þeim sem á þurfa að halda. Nýja fyrirkomulagið bætir þannig nýtingu orkuauðlinda landsins og eykur sveigjanleika orkufyrirtækja til að bregðast við breyttum aðstæðum í rekstri.“
Hörður Arnarson segir nýja samninga hafa í för með sér bætta nýtingu raforkukerfisins. „Meðalverð til viðskiptavina á heildsölumarkaði lækkar, miðað við áætlanir þeirra um innkaup á næsta ári. Eftirspurn eftir endurnýjanlegri orku frá Landsvirkjun er núna meiri en framboð. Þess vegna er afar mikilvægt að ná sem bestri nýtingu á því afli sem er til staðar í kerfinu, í samræmi við hlutverk fyrirtækisins, sem er að hámarka afrakstur af þeim orkulindum sem fyrirtækinu er trúað fyrir með sjálfbæra nýtingu, verðmætasköpun og hagkvæmni að leiðarljósi.“
