„Gjörið svo vel, viljið þið elsku vinir fara að semja. Ég er ekki að fara að setja lög á sjó­manna­deil­una,“ sagði Þor­gerður Katrín Gunn­ars­dótt­ir, sjáv­ar­út­vegs- og land­bún­að­ar­ráð­herra, í Silfr­inu á RÚV í morg­un. 

Þor­gerður Katrín segir ekki koma til greina að stjórn­völd komi að lausn sjó­manna­deil­unnar með sér­tækum hætti eins og dag­pen­ing­um. Hins vegar muni stjórn­völd fara yfir mögu­leik­ana á því að liðka fyrir með almennum hætti. Hún vill einnig að farið verði í end­ur­skoðun á skatt­kerf­inu almennt. „Nú erum við í ein­stöku tæki­færi til þess að gera skatt­kerfið ein­fald­ara, við eigum að ein­falda skatt­kerf­ið, ekki flækja það.“ Hún segir að krafan um það að sjó­mann fái dag­pen­inga bygg­ist á for­dæmi frá flug­liðum og flug­mönn­um, en það sé ekki heppi­legt dæmi. 

Hún sagði að það yrði að vera ljóst að það sé nú verið að krefj­ast þess með beinum hætti að ríkið komi að því að styrkja sjáv­ar­út­veg­inn með kröfum um skatt­frjálsa dag­pen­inga. Þetta telur Þor­gerður Katrín verða að setja í sam­hengi við þá kröfu og umræðu fyrir kosn­ingar að sjáv­ar­út­veg­ur­inn eigi að greiða sann­gjarnt og aukið afgjald fyrir notkun á fisk­veiði­auð­lind­inn­i. 

Hún segir að ef ríkið eigi að koma að deil­unni þá vilji hún miklu frekar skoða að gera það í gegnum almennar aðgerð­ir. Hún vilji frekar að fjár­magn fari beint í bæj­ar­fé­lögin sem verst verða úti í verk­fall­inu heldur en að það fari í nið­ur­greiðsl­ur.