Seðlabanki Íslands hefur sent frá sér yfirlýsingu vegna sölu bankans á skuldabréfum Kaupþings fyrir um 19 milljarða, og segir í yfirlýsingunni að það hafi alltaf staðið til að selja bréfin við fyrsta tæki.
Þá segir í yfirlýsingunni að bréfin sem um ræðir og voru gefin út af Kaupþingi séu ekki af því tagi sem seðlabankar almennt eigi, og að bankinn hafi ekki búið yfir neinum upplýsingum um samning Kaupþings og Deutsche Bank.
„Þau bréf sem hér um ræðir og gefin voru út af Kaupþingi eru ekki af því tagi sem seðlabankar almennt eiga: Því stóð alla tíð til að selja þau við fyrsta tækifæri. Seðlabanki Íslands seldi skuldabréfin auk þess til þess að fyrirbyggja hagsmunaárekstra þegar sala Kaupþings á Arion banka og tengdir þættir kæmu til umfjöllunar og eftir atvikum afgreiðslu í Seðlabankanum. Engar upplýsingar lágu opinberlega fyrir um samning Kaupþings við Deutsche Bank. Skuldabréfin voru seld í opnu ferli fyrir milligöngu alþjóðlega fjármálafyrirtækisins Morgan Stanley og allir sem uppfylltu almenn skilyrði (Mifid, KYC, AML) gátu gert kauptilboð,“ segir í yfirlýsingu Seðlabankans.
Þar segir ennfremur: „Bréfin voru síðan seld hæstbjóðanda. Engir fyrirvarar voru gerðir varðandi endurheimtur úr búinu enda hefðu slík ákvæði getað haft neikvæð áhrif á söluverð bréfanna og jafnvel gert þau óseljanleg. Samningur Kaupþings og Deutsche Bank, sem kynntur var eftir sölu Seðlabankans á bréfunum, kom aðilum á þessum markaði á óvart, þar með talið Seðlabankanum. Sala bankans á Kaupþingsbréfunum var eðlileg og skynsamleg á grundvelli þeirra upplýsinga sem lágu fyrir þegar ákvörðun um hana var tekin. Seðlabankinn mun eigi að síður kanna hvort eðlilega var staðið að upplýsingagjöf stjórnar Kaupþings á þessum tíma.“
Deutsche Bank lokaði ágreiningsmáli við Kaupþing með 50 milljarða króna eingreiðslu, og rauk verðgildi bréfa í Kaupþingi upp um 30 prósent á eftirmarkaði vegna þessara viðskipta. Eins og segir í yfirlýsingu Seðlabankans þá segist bankinn ekki hafa haft neinar upplýsingar um þessi viðskipti.
Þeir sem högnuðust á þessu uppgjöri, voru ekki síst vogunarsjóðirnir sem nú hafa keypt um 30 prósent hlut í Arion banki, og eiga forkaupsrétt á meira en 20 prósent til viðbótar.
Eftir kaupin er Kaupskil, félag í eigu Kaupþings, enn stærsti eigandi Arion banka með 57,9 prósent hlut. Íslenska ríkið á 13 prósent en sjóðirnir Attestor Capital LLP (í gegnum Trinity Invesment Designated Acitivity Company) og Taconic Capital Advisors UK LLP (í gegnum TCA New Sidecar III s.a.r.l.) eiga nú 9,99 prósent hlut hvor. Þá mun Sculptor Investments s.a.r.l. (félag tengt Och-Ziff Capital Management Group) eiga 6,6 prósent hlut og Goldman Sachs International 2,6 prósent hlut (í gegnum ELQ Investors II Ltd.).
