Kaup­fé­lag Skaga­fjarðar (KS) á sam­tals um 27,8 millj­arða króna í eigin fé miðað við stöðu mála hjá félag­inu í lok árs­ins. Þetta kom fram í inn­gangs­orðum Þór­ólfs Gísla­son­ar, kaup­fé­lags­stjóra, á aðal­fundi Kaup­fé­lags­ins í Sel­inu, mat­sal Kjöt­af­urða­stöðv­ar­innar á Sauð­ar­króki. 

Greint er frá þessi á frétta­vefnum Feyk­ir.is, sem fjallar um mál­efni Skaga­fjarð­ar. 

Hagn­aður af rekstri kaup­fé­lags­ins í fyrra nam 1,36 millj­örðum króna, sem er sam­bæri­legt við rekstr­ar­árið 2015. Sam­tals áttu 1.424 félags­menn inni­stæður í stofn­sjóði sem námu 165,6 millj­ónum króna. Sé horft á eigið fé félags­ins deilt niður á hvern félags­manna, þá er það 19,5 millj­ónir króna. 

Heild­ar­tekjur Kaup­fé­lags­ins voru 31,2 millj­arðar sem er lít­ils háttar lækkun frá fyrra ári. Rekstr­ar­hagn­aður fyrir afskriftir og fjár­magnsliði er 4,2 millj­arðar og er það sama tala og 2015 og einnig 2014.

Rekstr­ar­hagn­aður síð­ustu fimm ára er því rúm­lega 20 millj­arðar fyrir afskriftir og fjár­magnsliði. Laun og launa­tengd gjöld voru 7,5 millj­arðar á sein­asta ári sem er hækkun um hálfan millj­arð frá árinu á und­an.

Íbúar í sveit­ar­fé­lag­inu Skaga­firði voru ríf­lega 3.900 í byrjun þessa árs, sam­kvæmt tölum Hag­stofu Íslands, og er KS langstærsti vinnu­veit­and­inn á svæð­inu. FISK Seafood er hryggjar­stykkið í starf­semi kaup­fé­lags­ins en helstu rekstr­ar­ein­ingar KS eru mjólk­ur­af­urða­stöð, kjöt­af­urða­stöð, bif­reiða­verk­stæði, véla­verk­stæði, dag­vöru­verslun og bygg­inga­vöru­verslun sem er einnig rekstr­ar­vöru­verslun fyrir bænd­ur, sem eru félags­menn.