Ráðstöfunartekjur á mann jukust um 8,7 prósent milli ára og kaupmáttur ráðstöfunartekna á mann jókst um 6,9 prósent. Þetta kemur fram í frétt Hagstofunnar sem birtist í gær. Ráðstöfunartekjur heimilageirans jukust árið 2016 um 10,2 prósent frá fyrra ári. Þær eru skilgreindar sem samtölu launatekna, eignatekna, tilfærslutekna og reiknaðs rekstrarafgangs einstaklingsfyrirtækja en að frádregnum eigna- og tilfærsluútgjöldum.
Samkvæmt Hagstofunni eru þessar tölur að mestu byggðar á skattframtölum einstaklinga en leitast var við að laga þær sem best að uppgjöri þjóðhagsreikninga þar sem við átti. Tekið er sérstaklega fram að hagnaður af reiknaðri eigin leigu íbúðarhúsnæðis sé hér tekjufærður þótt hann komi ekki fram í framtali.
Söluhagnaði, þ.e. hagnaði af sölu hlutabréfa og almennum söluhagnaði, er einnig sleppt í uppgjörinu, með hliðsjón af tekjuhugtakinu í þjóðhagsreikningum. Tekjuhugtakið nær hér til þeirra tekna sem unnt er að ráðstafa án þess að gengið sé á efnahaginn. Er þá átt við efnahag í byrjun viðkomandi tímabils áður en hann tekur breytingum vegna fjármagnstilfærslna, söluhagnaðar eða -taps.
Eignatekjur jukust um 16,8%
Heildartekjur heimilageirans árið 2016 jukust um 11,1 prósent frá fyrra ári. Þar af jukust heildarlaunatekjur um 11,6 prósent, eignatekjur um 16,8 prósent og rekstrarafgangur einstaklingsfyrirtækja um 10,4 prósent. Heildartilfærslutekjur jukust um 7,4 prósent milli ára.
Heildareigna- og tilfærsluútgjöld jukust um 12,4 prósent milli ára, þar af jukust eignaútgjöld um 5,9 prósent og tilfærsluútgjöld um 13,3 prósent.
Samhliða birtingu talna fyrir árið 2016 hafa niðurstöður fyrri ára verið endurskoðaðar að hluta. Tölur um rekstarafgang af rekstri íbúðahúsnæðis hafa verið endurskoðaðar fyrir árið 2015, með hliðsjón af áður birtum tölum yfir reiknaða húsaleigu í einkaneyslunni. Útreikningar á náms- og rannsóknarstyrkjum yfir tímabilið 2012 til 2015 hafa verið leiðréttir en áhrif á heildarniðurstöður eru óveruleg. Auk ofangreindra breytinga er notast við endurskoðaðar tölur um nettólaun frá útlöndum yfir tímabilið 2013 til 2015.
