„Við mótmælum og fordæmum þessar aðgerðir og teljum að sýslumaður eigi ekkert erindi inn á ritstjórnarskrifstofur íslenskra fjölmiðla. Þessar aðgerðir eru aðför að tjáningarfrelsi fjölmiðla og rétti blaðamanna að afla sér gagna og vinna úr þeim. Bankaleynd þjónar engum nema þeim sem hafa eitthvað að fela!,“ segir Hjálmar Jónsson, formaður Blaðamannafélags Íslands í tilefni lögbanns á fréttaflutning Stundarinnar sem byggir á gögnum úr Glitni, á vef Blaðamannafélags Íslands.
Eins og greint var frá í dag, þá féllst Sýslumaðurinn í Reykjavík á kröfu Glitnis Holdco ehf. um lögbann á fréttaflutning Stundarinnar og Reykjavík Media, sem byggir á gögnum innan úr hinum fallna bankanum.
Í fréttatilkyningu sem Glitnir HoldCo sendi frá sér í dag kemur fram fyrirtækið hafi á á föstudag farið þess á leit við sýslumannsembættið á höfuðborgarsvæðinu að lögbann verði lagt við birtingu Stundarinnar og Reykjavík Media ehf. á fréttum eða annarri umfjöllun sem byggja á eða eru unnar úr gögnum er varða einkamálefni verulegs fjölda fyrrverandi viðskiptavina Glitnis sem eru því bundnar bankaleynd.
Þá hafi Glitnir ráðið breska lögmannsstofu til að gæta hagsmuna sinna vegna umfjöllunar The Guardian sem byggi á sömu gögnum.
„Afar fátítt er að lögbann sé sett á gögn sem fjölmiðlar á Íslandi byggja fréttir sínar á og mun útskurður sýslumans nú fara fyrir dómstóla. Sambærilegt mál kom m.a. upp árið 2009 þegar lögbanns var krafist á lánabók Kaupþings en sú krafa fékk dræmar undirtektir. Sama var uppi á teningnum fyrir 12 árum þegar í október 2005 var sett lögbann á tölvupósta Jónínu Benediktsdóttur sem Fréttablaðið hafði undir höndum. BÍ mótmælti þeim gjörningi þá líkt og nú. Það mál gekk alla leið til Hæstaréttar sem úrskurðaði að birting Fréttablaðsins á tilteknu innihaldi póstanna væri heimil þar sem þeir vörðuðu þjóðfélagslega mikilvægt mál og ættu erindi til almennings,“ segir á vef Blaðamannafélagsins.
