Henrik Egholm, forstjóri Skeljungs, segir í yfirlýsingu vegna sölu á hlutabrefum í Skeljungi, sem færðu honum og Johnni Poulsen forstjóra dótturfélagsins P/F Magn tæplega 230 milljóna króna hagnað, að hans sýn á verkefnið hjá Skeljungi sé það, að styrkja rekstur félagsins eins og kostur er.
Hann segir að kaupréttir þeirra eigi sér rættur í samningum frá árinu 2014, og að sala þeirra á bréfunum tengist ekki með neinum hætti áherslubreytingum í rekstri. „Viðskipti mín með hluti í Skeljungi eru í samræmi við kaupréttarsamkomulag sem gert var í aprílmánuði árið 2014, og fjallað er um í skráningarlýsingu félagsins frá nóvember 2016, og tilkynningu til kauphallarinnar þann 22. febrúar 2017. Tímasetning kaupréttanna hefur því legið fyrir í langan tíma og markaðsaðilar hafa fengið aðgang að öllum verðmótandi upplýsingum sem fyrir liggja. Það skal áréttað, að umtalsvert magn hlutanna sem ég keypti í Skeljungi er enn í minni eigu – að markaðsvirði um 12 milljónir króna - og engin áform eru uppi um að selja þá.
Í síðustu viku voru kynntar ákvarðanir um breytingar á skipulagi Skeljungs og hagræðingu í rekstrinum. Þeim breytingum er ætlað að styrkja fyrirtækið á hörðum samkeppnismarkaði, en einnig eru þær liður í því, að auka verðmæti Skeljungs til lengri tíma. Stjórnendur fyrirtækisins munu halda áfram að bæta reksturinn og festa Skeljung í sessi sem leiðandi afl á markaði sem er að breytast. Tímasetning minna viðskipta með hluti í félaginu hefur ekkert að gera með boðaða hagræðingu, heldur stýrist hún af af ákvæðum í kaupréttarsamningi,“ segir forstjórinn í yfirlýsingu. Samtals var 29 starfsmönnum sagt upp störfum, og boðaðar frekari breytingar.
Hann ítrekar síðan að hans ábyrgð sé á rekstri félagsins, í hörðu samkeppnisumhverfi.
„Sem forstjóri ber ég ábyrgð á rekstri Skeljungs. Allar rekstrarákvarðanir mínar miða að því einu, að bæta afkomu félagsins, bregðast við breytingum á markaði og tryggja samkeppnishæfni Skeljungs. Stefnulegar ákvarðanir mínar hafa ekkert að gera með kaup og sölu hlutabréfa, hvorki mín eigin né annarra.
