Útlit er fyrir kröftugan hagvöxt á þessu ári, eins og því síðasta, en að það hægi á gangi hagkerfisins á næstu árum. Þetta kemur fram í nýrri þjóðhagsspá Hagstofu Íslands fyrir árin 2017 til 2023.
Gert er ráð fyrir að á þessu ári aukist landsframleiðslan um 4,9 prósent, einkaneysla um 7,8 prósent og fjárfesting um 8,8 prósent, sem telst mikið í sögulegum samanburði.
Á næsta ári er hins vegar reiknað með því að það hægi á hjólum efnahagslífsins. Er reiknað með því að hagvöxtur verði 3,1 prósent, einkaneysla aukist um 5,3 prósent og fjárfesting um 3,1 prósent.
Talið er að samneysla aukist um 2,2 prósent á þessu ári og 1,3 prósent á næsta ári. Árin 2019–2023 er gert ráð fyrir að vöxtur landsframleiðslu verði í kringum 2,6 prósent, einkaneysluvöxtur minnki úr 3,6 prósent árið 2019 í 2,5 prósent árið 2023, fjárfesting aukist um 2,1–3,9 prósent og samneysla nálægt 1,8 prósent á ári.
Spáin gerir ráð fyrir miklum vexti í opinberri fjárfestingu og íbúðafjárfestingu, enda mikil þörf á því að auka framboð fasteigna á höfuðborgarsvæðinu þar sem vöxturinn er mestur og eftirspurnin sömuleiðis. „Spáð er miklum vexti íbúðafjárfestingar og opinberrar fjárfestingar en samdráttur verður meðal annars í stóriðjutengdri fjárfestingu árið 2018 og síðar. Viðskiptajöfnuður verður áfram jákvæður en versnar heldur þegar líður á spátímann. Gengi krónunnar styrktist framan af ári en gaf eftir þegar á leið. Tólf mánaða verðbólga er enn lág en búist er við að hún aukist nokkuð þegar áhrifa gengisstyrkingar hættir að gæta. Íbúðaverð hefur hækkað skarpt frá miðju ári 2016 en búist er við að aukið framboð fasteigna á næstu árum dragi úr spennu á íbúðamarkaði,“ segir í þjóðhagsspánni.
Verðbólga mælist nú 1,9 prósent, en hún hefur verið undir 2,5 prósent verðbólgumarkmiði Seðlabanka Íslands í á fjórða ár. Þá er atvinnuleysi með lægsta móti eða í kringum 3 til 4 prósent.
