„Sá flokkur sem olli síð­ustu stjórn­ar­slitum með gargi og atgangi út af litlu, kjós­endur ákváðu að henda honum út af þingi. Ég held að menn séu búnir að fá nóg af þessu gargi. Og þó að mönnum verði á í stjórn­sýslu sam­kvæmt ein­hverri nið­ur­stöðu Hæsta­rétt­ar, að það sé til­efni til afsagnar og menn standi hér alltaf á götu­hornum og heimti afsögn, þing­rof, nýjar kosn­ing­ar, út af engu, eða svo gott sem eng­u[...]þetta er örugg­lega sú ástæða sem stök er mesta skýr­ingin á þessu van­trausti sem almenn­ingur ber til stjórn­mál­anna.“ 

Þetta sagði Páll Magn­ús­son, þing­maður Sjálf­stæð­is­flokks, í Morg­un­út­varpi Rásar 2 í morg­un.

Þar ræddu Páll og Þor­gerður Katrín Gunn­ars­dótt­ir, for­maður Við­reisn­ar, meðal ann­ars kröfur um afsögn Sig­ríðar Á. And­er­sen dóms­mála­ráð­herra vegna Lands­rétt­ar­máls­ins, stjórn­ar­slitin síð­ast­liðið haust og traust í stjórn­mál­um.

Þor­gerður var ósam­mála Páli um að síð­asta rík­is­stjórn Sjálf­stæð­is­flokks, Við­reisnar og Bjartrar fram­tíðar hafi sprungið út af litlu. Upp­reist æru-­málið og leynd­ar­hyggjan í kringum það, þar sem upp­lýs­ingum um aðkomu föður Bjarna Bene­dikts­sonar að upp­reist æru dæmd barn­a­níð­ings var haldið frá sam­starfs­mönnum í rík­is­stjórn, þing­mönn­um, fjöl­miðlum og almenn­ingi, væri ekki lítið mál.

Páll brást við með því að segja: Þegar ég segi að stjórnin hafi sprungið út af litlu, þá skulum við hafa það í huga að sú stjórn sprakk ekki út af barn­a­níði. Hún sprakk heldur ekki út af upp­reist æru. Opin­ber skýr­ing Bjartrar fram­tíðar á því að sú stjórn sprakk er að þeir töldu sig hafa átt að fá að vita eitt­hvað í júlí sem þeir fengu að vita í sept­em­ber. Það var nú öll leynd­ar­hyggjan og það var nú allt trún­að­ar­rof­ið.“

„Út í hött“ að ráð­herra segi af sér

Páll var líka spurður út í þá stöðu sem Sig­ríður Á. And­er­sen dóms­mála­ráð­herra er í, en Hæsti­réttur komst að þeirri nið­ur­stöðu í des­em­ber að hún hefði brotið gegn stjórn­sýslu­lögum þegar hún ákvað að skipa fjóra dóm­ara í Lands­rétt sem dóm­nefnd hafði ekki talið hæf­asta til þess. Ný gögn sem birt voru í Stund­inni í gær sýndu að sér­fræð­ingar stjórn­ar­ráðs­ins höfðu varað ráð­herr­ann ítrekað við því að hún væri mögu­lega ekki að upp­fylla rann­sókn­ar­skyldu stjórn­sýslu­laga með athæfi sínu.

Páll sagði að fyrir sína parta væri allt í lagi með stöðu Sig­ríð­ar. Kröfur um afsögn hennar væru dæmi um ýkt, yfir­drifin og stór­karla­leg við­brögð við of litlu til­efni. „Ég held að það sé búið að þvarga þessu máli út í tals­verða vit­leysu[...]að tala um afsögn ráð­herra af þessum ástæðum finnst mér algjör­lega út í hött. Mér finnst að menn ættu að minnka gargið og þvargið í kringum þetta og horfa á  hvert er efni máls­ins. Það er ekk­ert til­efni til ráð­herra­af­sagnar í þessu máli.[...]Ég lít ekki svo á að þetta [mál] sé sér­stakur kist­ill á baki ráð­herra.“