Þórður Þór­ar­ins­son fram­kvæmda­stjóri Sjálf­stæð­is­flokks­ins segir nýskrán­ingar í flokk­inn fyrir odd­vita­próf­kjör flokks­ins í Reykja­vík um liðna helgi hafa farið á pari við und­an­farin próf­kjör. Nýskrán­ingar hafi verið heldur fleiri en fyrir síð­asta próf­kjör flokks­ins árið 2016 en heldur minni en árið 2014 í borg­inni.

Þórður segir í sam­tali við Kjarn­ann að flokk­ur­inn gefi ekki upp nákvæmar upp­lýs­ingar um fjölda skrán­inga, hvorki um hversu margir séu skráðir í flokk­inn né um nýskrán­ing­ar.

Hann segir ekki um að ræða gríð­ar­legan fjölda nýskrán­inga fyrir próf­kjörið um helg­ina.

Þátt­takan í odd­vita­kjör­inu var með dræmara móti í sam­an­burði við önnur próf­kjör flokks­ins fyrir borg­ar­stjórn­ar­kosn­ing­ar. Nú um helg­ina kusu alls 3.885 í odd­vita­próf­kjör­inu. Árið 2013 þegar Hall­dór Hall­dórs­son var kjör­inn odd­viti kusu 5.075 en 7.173 árið 2010 þegar Hanna Birna Krist­jáns­dóttir var kjör­in. Árið 2005 kusu 12.453 Vil­hjálm Þ. Vil­hjálms­son þegar hann lagði Gísla Mart­ein Bald­urs­son í slag um odd­vita­sæti sjálf­stæð­is­manna í borg­inni.

Þannig er ljóst að þátt­taka í próf­kjörum Sjálf­stæð­is­flokks­ins í Reykja­vík hefur farið hratt minnk­andi. Hins vegar má búast við minni þátt­töku þegar færri eru í fram­boði líkt og var nú í odd­vita­kjör­inu þegar fimm voru í fram­boði og aðeins kosið um eitt sæti á list­anum en ekki fleiri eins og áður hefur ver­ið.

Eyþór Arn­alds sigr­aði odd­vita­kjörið með miklum yfir­burðum um helg­ina með 61 pró­sent atkvæða.