Seðlabanki Íslands hefur birt undanþáguna sem bankinn veitti Kaupþingi frá gjaldeyrislögum þann 15. janúar 2016 svo Kaupþing gæti hafið útgreiðslu til kröfuhafa í slitabú Kaupþings. Forsenda undanþágunnar var að Kaupþing hefði uppfyllt stöðugleikaskilyrði sem íslensk stjórnvöld höfðu sett og eiga að tryggja að útgreiðslur úr búinu ógni ekki fjármálalegum stöðugleika né gengisstöðugleika í íslensku hagkerfi.
Ákvörðun um birtingu gagnanna, sem hingað til hefur ríkt leynd yfir, var tekin eftir að Bjarni Benediktsson, fjármála- og efnahagsmálaráðherra, sendi bréf til Seðlabankans og óskaði eftir því að bankinn kannaði mögulega birtingu. Í bréfi Bjarna segir að vegna aðkomu ríkisins að málinu og fyrirhugaðra breytinga á eignarhaldi ríkisins í Arion banka sé mikilvægt að viðhaft sé eins mikið gagnsæi og mögulegt sé í málinu.
Í frétt á vef Seðlabankans segir: „Í samræmi við lög og ákvæði í samningum aðila leitaði Seðlabankinn samþykkis Kaupþings, Kaupskila ehf. og Arion banka hf. fyrir birtingunni, og liggur það nú fyrir. Ekki er þó hægt að birta upplýsingar um málefni annarra einstaklinga og fyrirtækja en Kaupþings, Kaupskila og Arion banka og því strokað yfir þær þar sem við á. Þau atriði hafa hins vegar ekki efnislega þýðingu varðandi það sem er helsta tilefni birtingarinnar, þ.e. mögulegar breytingar á eignarhaldi kerfislega mikilvægs banka. Í ljósi þess að undanþágan og málefni henni tengd varða mikilvæga almannahagsmuni telur Seðlabankinn að góð og gild rök séu fyrir því að birta þessi skjöl nú með þessum hætti.“
Hægt er að lesa undanþágu Kaupþings frá gjaldeyrislögum hér.
