Þingflokksformaður VG segir samskiptin vera „svolítið erfið“

Bjarkey Olsen Gunnarsdóttir segir samskipti innan þingflokks Vinstri grænna séu erfið vegna stöðu Rósu Bjarkar Brynjólfsdóttur og Andrésar Inga Jónssonar.

Ritstjórn Kjarnans 16. mars 2018

Bjarkey Olsen Gunnarsdóttir, þingflokksformaður Vinstri grænna, segir að óhætt sé að segja að samskiptin innan þingflokks Vinstri grænna séu erfið vegna stöðu Rósu Bjarkar Brynjólfsdóttur og Andrésar Inga Jónssonar. Hvorugt þeirra studdi ríkisstjórnarsamstarf við Sjálfstæðisflokkinn þegar flokkurinn ákvað að fara í slíkt seint á síðasta ári og þau kusu einnig bæði með vantrauststillögu á Sigríði Á. Andersen dómsmálaráðherra í síðustu viku.

Í Fréttablaðinu í dag er umfjöllun um stöðuna innan þingflokks Vinstri grænna. Þar er haft eftir Bjarkeyju að samskiptin innan þingflokksins væru „svolítið erfið og hafa verið það og það er ekkert nýtt. Það er óhætt að segja að frá upphafi hefur þetta verið pínulítið þyngra en við höfum átt að venjast fram til þessa.“

Þar er einnig greint frá því að Bjarkey hafi reynt að kalla inn varamann fyrir Rósu á meðan að sú síðarnefnda er á fundi framkvæmdastjórnar og stjórnarnefndar Evrópuráðsins í París. Rósa afturkallaði það kall þar sem það er hvers þingmanns að ákveða hvort varamaður sé kallaður inn, ekki þingflokksformanns. Bjarkey segir í samtali við blaðið

http://www.visir.is/g/2018180319234?fb_action_ids=10156275785241514&fb_action_types=og.comments

að Rósa hafi orðið ósátt við þetta og fannst sem hún tæki fram fyrir hendurnar á sér. Það sé að mörgu leyti rétt. „Ég taldi hins vegar bara að það væri samkomulag um annað. Það voru kannski mistök af minni hálfu.“

Hefur stjórnarmeirihlutinn minnkað í 33?

Mikið hefur verið fjallað um það hvort að stjórnarmeirihluti ríkisstjórnar Katrínar Jakobsdóttur hafi formlega farið úr 35 í 33 þingmenn með ákvörðun Rósu og Andrésar í síðustu viku.

Í sjónvarpsþætti Kjarnans 7. mars sagði Birgir Ármannsson, þingmaður Sjálfstæðisflokks, að hann teldi það ekki liggja fyrir hver meirihlutinn væri á þeirri stundu. „„Við eigum eftir að heyra í félögum okkar í VG um það, hvernig þeir líta á það. Þeir þekkja auðvitað betur til. Hvernig svo sem það er þá lít ég svo á að þessi ríkisstjórn hafi traustan meirihluta. Og heldur ótrauð áfram að vinna að þeim málum sem hún er að undirbúa og framkvæma.“ Þingflokkur Vinstri grænna hefur enn ekki tekið málið fyrir á þingflokksfundi.

Helga Vala Helgadóttir, þingmaður Samfylkingarinnar, var líka gestur þáttarins. Hún sagðist hafa séð það hjá Þórdísi Kolbrúnu Reykfjörð Gylfadóttir, ráðherra ferðamála, iðnaðar og nýsköpunar og væntanlega næsta varaformanni Sjálfstæðisflokksins, að hún líti svo á að meirihlutinn teldi nú 33 þingmenn. „Ég veit ekki hvað ráðherrar VG eru að hugsa eða aðrir.“

Við þurfum á þínu framlagi að halda

Þú getur tekið beinan þátt í að halda úti öflugum fjölmiðli.

Við sem vinnum á ritstjórn Kjarnans viljum hvetja þig til að vera með okkur í liði og leggja okkar góða fjölmiðli til mánaðarlegt framlag svo við getum haldið áfram að vinna fyrir lesendur, fyrir fólkið í landinu.

Kjarninn varð níu ára í sumar. Þegar hann hóf að taka við frjálsum framlögum þá varð slagorðið „Frjáls fjölmiðill fyrir andvirði kaffibolla“ til og lesendur voru hvattir til að leggja fram í það minnsta upphæð eins kaffibolla á mánuði.

Mikið vatn hefur runnið til sjávar á þeim níu árum sem Kjarninn hefur lifað. Í huga okkar á Kjarnanum hefur þörfin fyrir fjölmiðla sem veita raunverulegt aðhald og taka hlutverk sitt alvarlega aukist til muna.

Við trúum því að Kjarninn skipti máli fyrir samfélagið.

Við trúum því að sjálfstæð og vönduð blaðamennska skipti máli.

Ef þú trúir því sama þá endilega hugsaðu hvort Kjarninn er ekki allavega nokkurra kaffibolla virði á mánuði.

Vertu með okkur í liði. Þitt framlag skiptir máli.

Ritstjórn Kjarnans: Sunna Ósk Logadóttir, Þórður Snær Júlíusson, Erla María Markúsdóttir, Arnar Þór Ingólfsson, Eyrún Magnúsdóttir og Grétar Þór Sigurðsson.

Já takk, ég vil styrkja Kjarnann!

Orðafjöldi: 472 Færslan var síðast uppfærð: 16. mars 2018, kl. 10:06
Færslan birtist fyrst: 16. mars 2018, kl. 9:14

Fréttinni var breytt klukkan 9:34 eftir ábendingu um að Bjarkey segi samskiptin innan þingflokksins vera erfið, ekki að Rósa Björk og Andrés séu erfið.