Leyni­legar við­ræður milli yfir­valda í Kína og Banda­ríkj­un­um, um leiðir til að liðka fyrir við­skiptum milli land­anna, eru hafn­ar. Þær fara fram í skugga áforma Don­alds Trumps, for­seta Banda­ríkj­anna, um að setja á sér­tæka tolla á ýmsar vöru­teg­undir sem fluttar eru í stórum stíl til Banda­ríkj­anna, ekki síst frá Kína.

Frá þessu greinir Wall Street Journal, og full­yrðir að Liu He, yfir­ráð­herra við­skipta­samn­inga Kína, leiði við­ræð­urnar fyrir hönd kín­verska yfir­valda, en Steven Mnuchin, fjár­mála­ráð­herra Banda­ríkj­anna, leiði þær fyrir hönd Banda­ríkj­anna.

Óhætt er að segja að miklir hags­munir séu í húfi þegar kemur að við­skipta­sam­bandi þess­ara ríkja. Ekki er langt síðan að efna­hags­ráð­gjafi Trumps, Gary Cohn, hætti störfum fyrir for­set­ann, og var ágrein­ingur um alþjóða­við­skipti og tolla­á­form sögð meg­in­á­stæða þess að hann hætti störf­um.

Trump hefur þegar boðað tolla á stál og ál, og einnig fleiri vör­ur, eins og þvotta­vélar og fleiri heim­il­is­tæki. Toll­arnir á stál verða 25 pró­sent og á ál 10 pró­sent, en þeir munu ekki ná til allra landa. Evr­ópu­sam­bandið hefur þegar fengið und­an­þágu frá þessum áformum og Kanada og Mexíkó einnig. Þær eru hins vegar tíma­bundn­ar, en Trump hefur sagt, að hann vilji að banda­rísk fyr­ir­tæki noti banda­ríska fram­leiðslu í sinni starf­semi. Loka­mark­miðið með toll­unum á inn­flutn­ing sé að styrkja við sköpun starfa í Banda­ríkj­un­um.

Í umfjöllun Wall Street Journal segir að við­ræð­urnar milli Kína og Banda­ríkj­anna taki til marg­vís­legra geira atvinnu­lífs­ins, þar á meðal fjár­mála­þjón­ustu og fram­leiðslu af ýmsu tagi.