Eftir mik­inn upp­gangs­tíma í íslensku hag­kerfi, allt frá árinu 2011, þá er gert ráð fyrir að það muni hægja nokkuð á hag­vexti á næstu árum og að lend­ing hag­kerf­is­ins verið „mjúk“ eins og segir í sam­an­tekt stjórn­valda, þar sem fjár­mála­á­ætlun fyrir árin 2018 til 2023 er kynnt. 

Áætlun stjórn­valda gerir ráð fyrir að skuldir hins opin­bera haldi áfram að lækka hratt, sem hlut­fall af árlegri lands­fram­leiðslu, og verði komnar undir 30 pró­sent lög­bundið hámark, strax á næsta ári. Í lok áætl­un­ar­tím­ans, árið 2023, eiga skuld­irnar að vera í kringum 20 pró­sent af árlegri lands­fram­leiðslu.

Á und­an­förnum árum hafa stoðir íslenska hag­kerf­is­ins styrkst hratt og mik­ið, sam­hliða end­ur­skipu­lagn­ingu á fjár­mála­kerf­inu og ævin­týra­legum upp­gangi íslenskrar ferða­þjón­ustu. Á síð­asta ári komu um 2,3 millj­ónir ferða­manna til lands­ins en árið 2010 voru þeir um 450 þús­und. Á árunum 2008 til 2016 hafa komið fleiri ferða­menn til lands­ins en komu í sex­tíu ár þar á und­an.

Þessi upp­gangur ferða­þjón­ust­unnar hefur skilað sér í auknum útflutn­ings­tekjum þjóð­ar­búss­ins, og hefur stuðlað að sterk­ari gengi krón­unnar gagn­vart erlendum mynt­u­m. 

Í fjár­mála­á­ætl­un­inni, sem byggir á spá um efna­hags­þróun á Íslandi, er ráð fyrir því gert að það muni hægja umtals­vert á hag­vext­in­um, eins og áður seg­ir, en að atvinnu­leysi verði áfram lítið sem ekk­ert, en það mælist nú um 3 pró­sent.