„Ég get bara sagt það alveg eins og er þannig að það dylj­ist engum að þær kröfur sem settar hafa verið fram núna eru fyrir samn­inga­nefnd rík­is­ins alger­lega óað­gengi­leg­ar.“

Þetta sagði Bjarni Bene­dikts­son, fjár­mála- og efna­hags­ráð­herra, þegar rætt um þá stöðu sem upp er í komin í kjara­deilu ljós­mæðra og rík­is­ins.

Hann árétt­aði að ekki færi vel á því, að reyna að setja málin í þann far­veg, að ekki væri borin virð­ing fyrir störfum ljós­mæðra. Hann hefði sjálfur farið fjórum sinnum á fæð­ing­ar­deild­ina og vissi vel hversu mik­il­væg störfin væru. 

For­maður samn­inga­nefndar rík­is­ins er Gunnar Björns­son, skrif­stofu­stjóri í fjár­mála- og efna­hags­ráðu­neyt­in­u. 

Bjarni sagði að góður gangur hefði verið í við­ræð­un­um, en síðan hefðu kröfur ljós­mæðra breyst og það hefði leitt til þeirrar stöðu sem nú væri komin upp. 

Ekki hefur verið greint frá því, nákvæm­lega, hverjar séu kröfur ljós­mæðra að öðru leyti en því, að þær krefj­ast þess að menntun þeirra verði metin til launa. Það er sex til sjö ára nám að baki ljós­mæðra­starf­inu, þegar starfs­nám er tekið með í reikn­ing­inn, en í mörgum til­vikum þá lækka ljós­mæður í launum við það, að bæta við sig nám­inu ofan á hjúkr­un­ar­fræði­nám­ið.

Hall­dóra Mog­en­sen, þing­maður Pírata og for­maður vel­ferð­ar­nefnd­ar, sagði að harð­línu­stefnu rík­is­stjórn­ar­innar í kjara­málum eiga eftir að bitna all­veru­lega á ljós­mæðr­um. „Það gengur ekki að segja að ábyrgðin sé hjá stétt­ar­fé­lög­unum vegna þess að síð­ast þegar ljós­mæður fóru í verk­fall sam­þykkti fjár­mála­ráð­herra lög á verk­fall­ið. Þær fengu ekki að semja.“