Don­ald Trump Banda­ríkja­for­seti er sagður hafa beðið Jim Mattis varn­ar­mála­ráð­herra, og ráð­gjafa sína á sviði alþjóða- og her­mála, að ráð­ast af hörku á valin skot­mörk í Sýr­landi, til að hefna fyrir efna­vopna­árás í land­inu á dög­un­um. 

Hann hefur einnig talað fyrir því að ekki verði aðeins ráð­ist á skot­mörk sem bein­ast að stjórn­ar­her Sýr­lands, heldur einnig helstu banda­lags­þjóð­un­um, Rúss­landi og Íran.

Frá þessu greinir Wall Street Journal í kvöld.

Rússar hafa þver­tekið fyrir það að hafa staðið að baki efna­vopna­árásinni í Sýr­landi, sem ban­aði í það minnsta 40 manns, en Sergei Lavrov utan­rík­is­ráð­herra Rúss­lands full­yrðir að árásin hafi verið svið­sett af erlendum leyni­þjón­ust­um, og nefndi Breta sér­stak­lega í því sam­bandi, sam­kvæmt umfjöllun breska rík­is­út­varps­ins BBC.

Í umfjöllun Wall Street Journal kemur fram að Mattis varn­ar­mála­ráð­herra vilji ekki grípa til frek­ari hern­aðar í Sýr­landi, nema að yfir­lögðu ráði og að upp­lýs­ingar stöðu mála séu skýr­ar. Hann hefur einnig lagt áherslu á sam­vinnu við aðrar þjóð­ir, en Trump vill að Banda­ríkin stýri ferð­inni, en upp­lýsi aðrar þjóð­ir, eins og Breta og Frakka, um hvað þau ætli sér að gera.

Ástandið í Sýr­landi er skelfi­legt, en talið er að yfir 10 millj­ónir manna, af um 20 millj­óna heildar­í­búa­fjölda, séu á flótta vegna borg­ar­styrj­ald­ar­innar í land­in­u.