Björgólfur Jóhannsson, sem sagði af sér sem forstjóri Icelandair fyrir skemmstu, er nýr stjórnarformaður Íslandsstofu. Auk hans voru Hildur Árnadóttir, varaformaður, Ásthildur Otharsdóttir og Jens Garðar Helgason, formaður Samtaka fyrirtækja í sjávarútvegi, öll tilnefnd af Samtökum atvinnulífsins. Þá voru Áshildur Bragadóttir og Borgar Þór Einarsson, aðstoðarmaður utanríkisráðherra, tilnefnd í stjórnina af Guðlaugi Þór Þórðarsyni utanríkisráðherra. Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra skipaði Friðjón R. Friðjónsson, einn eiganda KOM almannatengsla og miðstjórnarmann í Sjálfstæðisflokknum, í stjórnina.
Íslandsstofa er samstarfsvettvangur atvinnulífsins og stjórnvalda og hefur það hlutverk að auka gjaldeyristekjur þjóðarinnar með þróttmiklu starfi í þágu íslenskra útflutningsgreina.
Eitt af fyrstu verkum stjórnarinnar verður að ráða nýjan framkvæmdastjóra Íslandsstofu, en Jón Ásbergsson, sem hefur gengt starfinu frá árinu 2010, hefur óskað eftir því að láta af störfum. Staða framkvæmdastjóra verður auglýst á næstu dögum.
Í tilkynningu segir að hlutverk Íslandsstofu sé að „vera samstarfsvettvangur atvinnulífs, hagsmunasamtaka, stofnana og stjórnvalda um stefnu og aðgerðir til þess að auka útflutningstekjur og hagvöxt. Enn fremur að veita alhliða þjónustu og ráðgjöf til allra útflutningsgreina í því skyni að greiða fyrir markaðssetningu og útflutningi á vöru og þjónustu og að laða erlenda ferðamenn til landsins með samræmdu kynningar- og markaðsstarfi. Þá er Íslandsstofu ætlað að laða erlenda fjárfestingu til landsins og upplýsa erlenda fjárfesta um kosti Íslands og að styðja við kynningu á íslenskri menningu, vörum og þjónustu erlendis.“
Björgólfur, nýr stjórnarformaður, segir spennandi tíma vera framundan hjá Íslandsstofu. „Gríðarmargt hefur áunnist á undanförnum árum undir forystu Jóns Ásbergssonar sem hefur unnið óeigingjarnt starf, af miklum metnaði og fagmennsku. Það var eindregin ósk nýrrar stjórnar þegar ljóst var að Jón vildi láta af starfi framkvæmdastjóra að hann myndi áfram ljá okkur krafta sína í nýju hlutverki. Nú horfum við til framtíðar og það er ljóst að breytt rekstrarform gefur okkur tækifæri til að halda áfram að sækja fram af krafti fyrir íslenskt atvinnulíf.“
