Eitt af lyk­il­at­riðum í jákvæðri fram­fara­þróun í heil­brigð­is­þjón­ust­unni hér á landi er að tryggja nýliðun lækna og aðstreymi nýrrar þekk­ingar og reynslu. Þetta segir Reynir Arn­gríms­son‚ erfða­læknir og for­maður Lækna­fé­lags Íslands, í grein sem birt­ist í Lækna­blað­inu sem kom út í byrjun sept­em­ber.

Hann telur það válega stöðu þegar þeim þætti er ógnað til lengri eða skemmri tíma og bendir á að starf­andi læknar á Íslandi séu í dag 1296 og erlendis starfi 815 íslenskir lækn­ar.

„Ný­liðun þarf að eiga sér stað á öllum sviðum lækn­is­þjón­ust­unn­ar. Á sama tíma og lands­mönnum hefur fjölgað um 30.000 frá árinu 2010, hefur fast­ráðnum heilsu­gæslu­læknum fækkað hjá öllum heil­brigð­is­stofn­un­unum nema einn­i,“ segir hann. Meðal ann­ars hafi stöðu­gildum sem setin eru af sér­fræð­ingum í heim­il­is­lækn­ingum hjá hinu opin­bera fækkað um 13 pró­sent, mest á lands­byggð­inni, eða frá 5 til 47 pró­sent. Hjá heilsu­gæslu­stöðvum í einka­rekstri sem hið opin­bera hefur náð að gera þjón­ustu­samn­ing við sé staðan önnur en þar starfi nú 29 sér­fræð­ingar í heim­il­is­lækn­ing­um.

Reynir segir að á sjúkra­húsum hafi verið bent á að starfs­að­stæður séu óvið­un­andi og álag á sjúkra­hús­læknum á Land­spít­ala sé fram úr hófi á mörgum deild­um, til dæmis bráða­mót­tök­unni. Bráða­læknar hafi talað fyrir daufum eyrum allt frá nær­stjórn­endum upp í ráðu­neyti. Þar séu þeir ekki einir á báti. „Stöðu­heim­ildum þarf að fjölga og nýliðun þarf að örva á sjúkra­húsum lands­ins. Þjón­ustu­liðum verður ekki bætt þar við án slíkra aðgerða.“

Í grein­inni kemur fram að Lækna­fé­lag Íslands leggi áherslu á að aðgengi að fag­legri þekk­ingu lækna sé ætíð tryggt og til staðar í land­inu, þar með talið með sam­felldri nýliðun lækna. Að fram fari mat á mann­afla­þörf lækna á öllum sviðum sér­greina­lækn­inga, þar með talið heim­il­is­lækna og á meðal almennra lækna. Tryggja þurfi að sér­hæfð lækna­þjón­usta sé áfram veitt utan sjúkra­húsa með samn­ingum um opin­bera þjón­ustu sér­greina­lækna á eigin lækna­stofum og heilsu­gæslu­stöðv­um. 

End­ur­skoða þarf kjör lands­byggð­ar­lækna með stjórn­valdsátaki, sam­kvæmt Lækna­fé­lag­inu. „Styrkja þarf þjón­ustu sér­fræði­lækna og bæta vinnu­að­stæður á Land­spít­ala og öðrum sjúkra­húsum með auknum fram­lögum í fjár­lögum rík­is­ins. Að verk­efni hvers þjón­ustu­að­ila séu vel skil­greind og end­ur­skoðuð með þarfir skjól­stæð­inga í fyr­ir­rúmi. Að áhersla verði lögð á gæða­starf og leið­andi hlut­verk lækna.“

Hægt er að lesa grein­ina í heild sinni á vef Lækna­blaðs­ins.