Gengi krón­unnar hefur styrkst mikið að und­an­förnu, eftir snögga veik­ingu í haust og fram í byrjun des­em­ber. Banda­ríkja­dalur kost­aði rúm­lega 125 krónur fyrr í mán­uð­in­um, en kostar nú 117 krón­ur. Evra var um tíma komin yfir 140 krónur en kostar nú rúm­lega 132 krón­ur. 

Svo virð­ist sem áhyggjur af því að mik­ill vandi myndi skap­ast í hag­kerf­inu, meðal ann­ars vegna fjár­hags­vanda flug­fé­lags­ins WOW air, hafi koðnað nið­ur. Yfir­lýs­ing Icelandair um að félagið muni auka fram­boð flug­sæta um meira en fjórð­ung á næstu miss­erum, hefur meðal ann­ars orðið til þess að slá á áhyggjur um mikil nei­kvæð marg­feld­is­á­hrif af sam­drætt­inum sem WOW air hefur þegar boð­að. 

Ekki liggur enn fyrir nið­ur­staða í við­ræðum WOW air og Indigo Partners, um fjár­fest­ingu síð­ar­nefnda félags­ins í WOW air, en þegar hefur verið boð­aður umtals­verður sam­dráttur í starf­semi á næsta ári, sem jafn­gildir heim­sóknum erlendra ferða­manna til Íslands upp á um 180 til 290 þús­und manns á árs­grund­velli. 

Und­ir­liggj­andi staða íslenska hag­kerf­is­ins er góð um þessar mund­ir, þrátt fyrir að verð­bólga hafi farið hækk­andi, og mælist nú 3,7 pró­sent, en verð­bólgu­mark­mið er 2,5 pró­sent. Við­var­andi við­skipta­af­gangur er af við­skiptum við útlönd og var hann 76,5 millj­arðar á þriðja árs­fjórð­ungi.

Olíu­verð hefur hrunið niður und­an­farnar vik­ur, sem kemur sér vel fyrir Ísland, þar sem það sparar þjóð­ar­bú­inu gjald­eyri og dregur úr verð­bólgu­þrýst­ingi. Tunnan af hrá­olíu kostar nú 45 Banda­ríkja­dali en ein­ungis eru um sjö vikur síðan hún kost­aði 85 Banda­ríkja­dali.