Tekin hefur verið sú ákvörðun að hætta útgáfu tíma­rits­ins MAN sem gefið hefur verið út af útgáfu­fé­lag­inu Mantra ehf. frá árinu 2013. Þetta kemur fram í stöðu­upp­færslu hjá tíma­rit­inu á Face­book í dag en undir hana skrifa Björk Eiðs­dóttir rit­stjóri blaðs­ins og Auður Hún­fjörð fram­kvæmda­stjóri útgáf­unn­ar.

Í til­kynn­ingu frá tíma­rit­inu kemur fram að des­em­ber-­tölu­blað­ið, sem for­seta­frúin Eliza Reid prýddi for­síð­una á, hafi verið síð­asta tölu­blað útgáf­unn­ar. „Það er auð­vitað sárt að þurfa að hætta útgáfu þess sem að okkar mati hefur verið eitt vand­að­asta tíma­rit lands­ins en sökum erf­iðs rekstr­ar­um­hverfis sjáum við þá leið eina færa,“ segir Auð­ur.

Félagið hefur verið rekið af henni ásamt Björk Eiðs­dóttur rit­stjóra tíma­rits­ins. „Þó svo að tíma­ritið hafi fengið frá­bærar mót­tökur eru aðstæður til slíkrar útgáfu hér á landi, á þessum litla mark­aði, því miður nán­ast ómögu­legar og fara síst batn­andi. Við höfum frá degi eitt haft allt undir og reynt að láta rekst­ur­inn ganga upp, með því að vinna sjálfar allt það sem við gátum og skera niður þar sem hægt er án þess að það bitni á gæð­um. Við alla vega reyndum allt sem við gátum og göngum að því leyti sáttar frá borði, þó svo að þetta sé ekki sárs­auka­laust,“ segir Björk.

Þær vilja koma á fram­færi þakk­læti til starfs­fólks sem mörg hver hafi starfað fyrir útgáf­una frá fyrsta degi, dyggra les­enda og áskrif­enda.