„Þegar það kemur gagnrýni á eitthvað eins og þriðja orkupakkann þá tek ég það mjög alvarlega. Við sögðum að við ætluðum að skoða þetta jafnvel og mögulegt er. Það er það sem við erum að gera. Hins vegar liggur það alveg fyrir að það er alveg ljóst að menn eru oft að tala um allt aðra hluti heldur en þriðja orkupakkann þegar menn eru að ræða þessa hluti[...]Þetta er eitthvað sem við erum að fá frá Noregi, enda eru norskir útsendarar sem eru bara hér eins og gráir kettir frá norska Miðflokknum sem að hafa það á stefnuskrá sinni að ganga út úr EES.“
Þetta segir Guðlaugur Þór Þórðarson utanríkisráðherra í viðtali við Þórð Snæ Júlíusson, ritstjóra Kjarnans, í sjónvarpsþættinum 21 á Hringbraut sem frumsýndur verður klukkan 21 í kvöld. Þar ræðir hann meðal annars samninginn um Evrópska efnahagssvæðið (EES), norðurslóðamál, þriðja orkupakkann og Brexit, svo fátt eitt sé nefnt.
Hægt er að sjá stiklu úr þættinum hér að neðan.
Guðlaugur Þór segir í þætti kvöldsins að það sé kaldhæðnislegt að öfgafylkingar úr báðum áttum í Evrópuumræðunni virðist nota sömu rökin fyrir afstöðu sinni. „Þeir sem vilja fara í ESB hafa sagt það að við tökum 90 prósent af gerðunum og þess vegna ættum við að fara inn. Nú koma hinir sem vilja fara út úr EES og segja að við tökum upp 90 prósent af gerðunum, þetta er algjörlega óásættanlegt, við þurfum að fara út úr EES.
Þetta er náttúrulega ekki rétt. Ef menn komast að þeirri niðurstöðu, sem ég held að væri afskaplega óskynsamlegt, að við vildum fara út úr EES, þá skulum við undirbyggja það mjög vel.“
Guðlaugur Þór segir það gríðarlega mikilvægt fyrir Ísland að hafa aðgang að þeim stóra markaði sem innri markaður Evrópusambandsins sé. Þá geti litlu fyrirtækin á litla Íslandi keppt á jafnréttisgrunni við fyrirtækin á meginlandinu. „Þau tækifæri eru nokkuð sem við verðum þá að vera viss um að fá með öðrum hætti, ef við ætlum að fara út úr EES. En ég tel mjög mikilvægt að taka þessa umræðu.“
