Mælaborð ferðaþjónustunnar geymir nú upplýsingar um komur og brottfarir til og frá Keflavíkurflugvelli frá ársbyrjun 2018.
Frá þessu er greint á vef Ferðamálastofu, en það er ferðaþjónustumiðillinn Túristi.is sem leggur gögnin til, en Kristján Sigurjónsson, eigandi og ritstjóri Túrista, hefur safnað gögnunum saman allt frá árinu 2011.
„Ég hef allt frá árinu 2011 gert daglegar talningar á flugferðum til og frá Keflavíkurflugvelli og birt mánaðarlega samantekt af fjölda flugferða. Lengst af hef ég sótt gögnin handvirkt inn á heimasíðu Keflavíkurflugvallar á hverjum einasta degi og það hefur ekki alltaf verið einfalt að koma því við,“ segir Kristján Sigurjónsson, útgefandi Túrista.
Hann bætir við að núna sé hins vegar hægt að sækja þetta rafrænt með einföldum forritum og hann fagni því að Ferðamálastofa hafi tekið við að miðla þessum göngum á Mælaborði ferðaþjónustunnar. „Af þeim sökum hef ég fært þeim öll mín skjöl fyrir síðasta ár og hlakka til að sjá þau birtast á Mælaborðinu,“ segir Kristján.
„Þessi mikilvægu gögn flugumferðar voru fengin hjá ferðafjölmiðlinum Túrista og fæst nú loks í fyrsta skipti heildstæð mynd yfir hvaða flugfélög fljúga til Íslands, tíðni flugferða, fjöldi flugleggja og fleira,“ segir í frétt Ferðamálastofu.
Gögn og upplýsingar sem verða til á Keflavíkurflugvelli eru mikilvæg verðmæti fyrir íslenska ferðaþjónustu og er Ísland í algerri sérstöðu þegar kemur að notandagildi þeirra, segir í frétt Ferðamálastofu.
„T.d. hefur verið sýnt fram á að fjöldi ferðamanna frá einu landi helst í hendur við framboð fluga frá sama landi og er því nauðsynlegt að upplýsingar um staðfestar og áætlaðar brottfarir og komur á Keflavíkurflugvelli sé betur niðurbrotið, uppfært og gefið út með reglubundnum hætti. Þannig væri hægt að átta sig betur á framboði. Aðgengið að þessum gögnum hefur verið af skornum skammti og óskaði Ferðamálastofa eftir þessum upplýsingum frá Isavia seint árið 2017 og er ekki komin niðurstaða í þá fyrirspurn,“ segir Ferðamálastofa.
Í liðinni viku byrjaði Mælaborð ferðaþjónustunnar að birta tölur um yfirlit flugumferðar um Keflavíkurflugvöll, líkt og fram kom hér á vefnum. Tölurnar eru sóttar á vef Isavia en þar sem ekki hefur reynst hægt að fá tölur aftur í tímann frá Isavia var leitað til ferðafjölmiðilsins Túrista sem brást vel við og afhenti Ferðamálastofu gögn fyrir allt síðasta ár.
