A.G. Sulz­berger, útgef­andi New York Times, segir í bréfi sem birt hefur verið á vef banda­ríska stór­blaðs­ins, að tala Banda­ríkja­for­seta, Don­alds Trumps, um að blaða­menn og fjöl­miðlar séu „óvinir fólks­ins“ sé ekki bara skað­legt Banda­ríkj­unum og umheim­in­um, heldur bein­línis hættu­leg­t. 

Hann segir að öryggi blaða­manna sé ógnað vegna þessa, og að áhrifin séu ekki bara bundin við Banda­ríkin heldur heim­inn allan, enda sé emb­ætti Banda­ríkja­for­seta valda­mikið emb­ætti sem hafi mikil áhrif. 

Fyrr í dag birti Trump á Twitter síðu sinni ásak­anir um að umfjöllun New York Times væri röng og að mið­ill­inn væri „óvinur fólks­ins“. 

Ekki er langt síðan að upp­lýst var um það af banda­rískum yfir­völd­um, að Christopher P. Has­son, yfir­maður í land­helg­is­gæslu Banda­ríkj­anna, hafi lagt á ráðin um fjöldamorð, þar sem blaða­menn og stjórn­mála­menn Demókrata voru helsta skot­mark­ið. Kom fram í yfir­lýs­ingu yfir­valda að vopna­safnið hans hefði verið nær án for­dæma, og að fyr­ir­ætlan manns­ins hefði ver­iði að drepa sem flesta á sem skemmstum tíma. 

Sulz­berger segir í bréfi sínu, að New York Times hafið staðið vörð um frjálsa fjöl­miðlun og tján­ing­ar­frelsið í 167 ár, og í gegnum valda­tíð 33 for­seta. Það muni áfram leggja áherslu á að veita vald­höfum aðhald með frjálsri blaða­mennsku.