Verk­falls­að­gerð­inar sem hafa verið boð­að­ar, eftir að kjara­við­ræðum var slitið í gær, munu bein­ast í fyrstu að allt að 25 hót­elum og gisti­húsum á höf­uð­borg­ar­svæð­inu og einnig stærstu rútu­fyr­ir­tækj­un­um. 

Þetta hefur Ragnar Þór Ing­fóls­son, for­maður VR, stað­fest í við­tali við fjöl­miðla í dag, en end­an­leg áætlun hefur þó ekki verið kláruð enn­þá.

Í verk­fjalls­sjóðum stétt­ar­fé­lag­anna eru til um sjö millj­arðar króna, og því geta verk­föll staðið nokkuð lengi, fari svo að samn­ingar náist ekki. 

Innan Efl­ing­ar, VR, Verka­lýðs­fé­lags Akra­ness og Verka­lýðs­fé­lags Grinda­víkur eru nú um 53 þús­und félags­menn.

Katrín Jak­obs­dótt­ir, for­sæt­is­ráð­herra, hvatti aðila vinnu­mark­að­ar­ins, til þess að reyna að ná samn­ing­um, í við­tölum við fjöl­miðla í gær og sagði að það væru hags­munir allra að ná samn­ingum um kaup og kjör.

Sam­tök atvinnu­lífs­ins birtu í dag umfjöllun á vef sínum um kröfur Efl­ing­ar, og full­yrt er þar að þær geri ráð fyrir allt að 80 pró­sent hækkun launa út samn­ings­tím­ann miðað við kröf­urn­ar. 

„Kröfu­gerðin fól þannig í sér að lægstu byrj­un­ar­laun hækk­uðu um 59% á samn­ings­tím­anum og hæsta ald­urs­þrep í hæsta virka launa­flokki kjara­samn­ings­ins hækk­aði um 82%. Í krónum talið var gerð krafa um að lægstu byrj­un­ar­laun hækk­uðu um 158 þús.kr. á mán­uði en laun í hæsta ald­urs­þrepi í hæsta virka launa­flokki um 248 þús.kr. á mán­uði. Lægstu launin hækk­uðu þannig minnst í krónum og pró­sentum en hæstu umsömdu launin um hæstu pró­sent­una og hæstu krónu­töl­una,“ segir á vef SA.