Hösk­uldur H. Ólafs­son, banka­stjóri Arion banka, hefur sagt starfi sínu lausu. Stjórn bank­ans og Hösk­uldur hafa kom­ist að sam­komu­lagi um að hann sinni starfi banka­stjóra fram til næstu mán­að­ar­móta.

Þetta kemur fram í til­kynn­ingu til kaup­hall­ar.

„Nú eru um níu ár síðan ég kom til starfa hjá bank­an­um. Óhætt er að segja að verk­efnin hafi verið fjöl­breytt á þessum árum. Fyrstu árin fólst verk­efnið fyrst og fremst í að takast á við skulda­vanda við­skipta­vina bank­ans, bæði fyr­ir­tækja og heim­ila. Þá var hlut­fall vand­ræða­lána hjá bank­anum vel yfir 50% en er í dag í takt við það sem best ger­ist hjá fjár­mála­fyr­ir­tækjum í lönd­unum í kringum okk­ur. Við tók upp­bygg­ing bank­ans og Arion banki er í dag með skýra fram­tíð­ar­sýn, öfl­ugan mannauð og í for­ystu hér á landi þegar kemur að þróun fjár­mála­þjón­ustu. Eftir vel heppnað alþjóð­legt hluta­fjár­út­boð á síð­asta ári var bank­inn skráður á markað í kaup­hallir á Íslandi og í Sví­þjóð og er eign­ar­hald bank­ans í dag vel dreift og hlut­hafar bæði inn­lendir og erlendir fjár­fest­ar. Bank­inn er fjár­hags­lega sterkur með traustan grunn­rekstur og vel í stakk búinn fyrir það sem fram­tíðin ber í skauti sér. Ég tel þetta vera rétta tím­ann til að fela öðrum að taka við kefl­in­u,“ segir Hösk­uldur í til­kynn­ing­unni.

Arion banki er nú skráður á markað bæði á Íslandi og í Sví­þjóð, en mark­aðsvirði hans 153 millj­arðar króna, eftir rúm­lega 1 pró­sent lækkun í dag, en eigið fé bank­ans um síð­ustu ára­mót var 200,9 millj­arð­ar.

Brynjólfur Bjarna­son, stjórn­ar­for­maður bank­ans, þakkar Hös­k­uldi fyrir hans starf í þágu bank­ans, á upp­bygg­ing­ar­tíma hans. „Ég vil þakka Hös­k­uldi fyrir hans mik­il­væga þátt í þróun og upp­bygg­ingu Arion banka á síð­ustu níu árum. Hans for­ysta og stað­festa hafa reynst bank­anum vel í gegnum ýmsar áskor­anir á þeim árum sem hann hefur verið við stjórn­völ­inn. Við í stjórn bank­ans virðum hans ákvörðun um að nú sé góður tíma­punktur til að láta af störf­um. Hösk­uldur skilar góðu búi þar sem bank­inn nýtur sterkrar stöðu á þeim mörk­uðum sem hann starfar á. Fyrir hönd stjórnar bank­ans þakka ég Hös­k­uldi mik­il­vægt fram­lag í þágu bank­ans.“ 

Nokkrar breyt­ingar hafa orðið á hlut­hafa­hópi Arion banka að und­an­förnu. Kaup­skil er enn stærsti hlut­haf­inn með 18,4 pró­sent hlut en Taconic Capi­tal er með 14,3 pró­sent hlut. 

Stoðir hf., áður FL Group, er meðal stærstu hlut­hafa bank­ans með 4,22 pró­sent hlut.