Davíð Stefánsson hefur verið ráðinn ritstjóri Fréttablaðsins. Hann tekur við sem annar tveggja ritstjóra blaðsins frá 1. júní næstkomandi. Frá þessu er greint á vef Fréttablaðsins í dag.
Davíð varð stúdent frá Menntaskólanum á Akureyri árið 1985, stjórnmálafræðingur frá Háskóla Íslands 1995 og hlaut meistaragráðu í stjórnsýslufræðum frá Harvard háskóla, John F. Kennedy School of Government, Bandaríkjum árið 1997.
Hann hefur verið dagskrárgerðarmaður á sjónvarpsstöðinni Hringbraut síðustu mánuði þar sem hann sá um þáttinn Ísland og umheimurinn.
Davíð hefur jafnframt rekið eigið ráðgjafarfyrirtæki frá árinu 2009 einkum á sviði viðskipta- og verkefnaþróunar með áherslu á endurnýjanlega orku. Viðskiptavinir fyrirtækisins eru alþjóðleg ráðgjafafyrirtæki, bankar, fjárfestingasjóðir og orkufyrirtæki í Norður og Suður Ameríku, Afríku, Evrópu og Asíu auk Íslands.
Davíð segir í frétt blaðsins að það sé mikil og skemmtileg áskorun að takast á við ritstjórastarf langmest lesna blaðs landsins. Á Fréttablaðinu vinni mjög hæfileikaríkt og útsjónarsamt fólk. Í samvinnu við þann sterka hóp vonist hann til að efla blaðið enn frekar sem helsta dagblað landsins.
