Ný útlán í banka­kerf­inu hafa dreg­ist saman að und­an­förnu, meðal ann­ars vegna breyt­inga á reglu­verki. Æski­legt væri nú, til að vinna gegn sam­drætti í efna­hags­líf­inu, að liðka fyrir nýjum útlánum til að örva fjár­fest­ingu.

Þetta er meðal þess sem er til umfjöll­unar í grein­ingu frá grein­ing­ar­deild Arion banka. 

Í grein­ing­unni segir meðal ann­ars að breyt­ingar á reglu­verki, þar sem hertar eru kröfur um eigið fé hjá bönk­um, leiði til þess að útlána­geta verður skert­ari. 

Í grein­ing­unni er minnst á það að Seðla­bank­inn hafi  nýverið breytt reglum um við­skipti sín við fjár­mála­fyr­ir­tæki og gert sér­tryggð skulda­bréf, sem eru tryggð með hús­næð­is­lánum ein­stak­linga í íslenskum krón­um, hæf til trygg­ing­ar. 

„Breyt­ingin er tíma­bær, til þess fallin að lækka vaxta­stig, örva útlán, milda efna­hags­sam­drátt og end­ur­speglar sýn Seðla­bank­ans á kólnun hag­kerf­is­ins. Önnur nýleg ákvörð­un, hækkun á eig­in­fjár­kröfum bank­anna, gengur hins vegar í aðra átt. Þessar ákvarð­anir geta haft tölu­verð áhrif á fjár­mála­mark­aði og þar með hag­kerfið þó ekki fari mikið fyrir þeim í almennri umræðu þar sem nær öll áhersla er á stýri­vexti Seðla­bank­ans,“ segir í grein­ing­unni.

Þá er því velt upp, hvort þessar kröfur um eig­in­fjár­auka séu rang­lega tíma­sett­ar, í ljósi gjör­breyttrar stöðu í hag­kerf­inu, eftir sam­drátt í ferða­þjón­ustu við fall WOW air. „Ákvörð­unin er skilj­an­leg í ljósi kröft­ugs útlána­vaxtar um það leyti og fjórð­ung­ana á und­an. Hins vegar drögum við í efa að fjár­mála­sveiflan sé nú á þeim stað að hægja þurfi á upp­sveiflu. Efna­hags­horfur hafa snú­ist býsna hratt eins og t.d. vaxta­lækk­anir Seðla­bank­ans bera með sér.“