Tekjur Marel námu 327 milljónum evra á öðrum ársfjórðungi 2019, sem samsvarar rúmum 44 milljörðum íslenskra króna. Þetta er tíu prósent hækkun samanborið við sama tímabil í fyrra og jókst rekstrarhagnaður um 15 prósent. EBIT framlegð var 15,2 prósent til samanburðar við 14,6 prósent á öðrum ársfjórðungi síðasta árs. Þetta kemur fram í tilkynningu fyrirtækisins til Kauphallarinnar í dag.
Þá segir að mótteknar pantanir hafi verið 311 milljónir evra, eða rúmir 42 milljarðar króna, sem er sjö prósent aukning frá öðrum ársfjórðungi síðasta árs en lítilleg lækkun frá fyrsta ársfjórðungi þessa árs.
Árni Oddur Þórðarson, forstjóri fyrirtækisins, segir að þau sjái sveiflur á mörkuðum þar sem aukning sé í pöntunum á stærri verkefnum í Asíu og Kína, á meðan hægst hafi á stærri pöntunum í Evrópu og Norður Ameríku. Á móti komi góður vöxtur í endurnýjunar- og viðhaldsverkefnum hjá viðskiptavinum þeirra í Evrópu og Norður Ameríku.
Viðburðaríkir tímar hjá Marel
„Annar ársfjórðungur var sannarlega viðburðarríkur fyrir Marel. Óhætt er að segja að skráningin í Euronext kauphöllina í Amsterdam og útgáfa 15 prósent nýs hlutafjár hafi borið hæst á fjórðungnum samhliða áframhaldandi vexti og góðri rekstrarafkomu,“ segir Árni.
Hann segir jafnframt að þau séu afar þakklát fyrir það traust sem Marel hafi verið sýnt í hlutafjárútboðinu í tengslum við tvíhliða skráningu félagsins á alþjóðlegan hlutabréfamarkað. „Þátttakendur voru virtir alþjóðlegir hornsteinsfjárfestar auk einstaklinga og fagfjárfesta, hér heima og erlendis. Alls tóku 4.700 fjárfestar þátt í útboðinu en fyrir skráningu félagsins í Euronext Amsterdam voru hluthafar félagsins 2.500 talsins. Skráningin í Euronext kauphöllina í Amsterdam mun styðja við næstu skref í framþróun Marel þar sem aukinn seljanleiki bréfanna á alþjóðavísu veitir félaginu gjaldmiðil í tengslum við fyrirtækjakaup. Vöxtur félagsins er knúinn áfram af nýsköpun og markaðssókn ásamt ytri vexti.
Að því sögðu erum við á réttri leið með að ná vaxtarmarkmiðum okkar fyrir árið 2026, sem eru 3 milljarðar evra í tekjur og fyrsta flokks arðsemi. Í samstarfi við viðskiptavini okkar viljum við umbylta matvælaframleiðslu á heimsvísu með áherslu á fæðuöryggi, rekjanleika, sjálfbærni og hagkvæmni.”
Í hlutafjárútboð í Hollandi
Þann 7. júní síðastliðinn voru hlutabréf Marel í evrum tekin til viðskipta í Euronext kauphöllinni í Amsterdam, til viðbótar við fyrri skráningu félagsins í Nasdaq kauphöllina á Íslandi. Boðnir voru til sölu 100 milljónir nýrra hluta, eða sem samsvarar um 15 prósent af útgefnu hlutafé. Margföld umframeftirspurn var í útboðinu með mikilli eftirspurn frá einstaklingum og fagfjárfestum, samkvæmt tilkynningu fyrirtækisins. Inngreiðsla hlutafjár að teknu tilliti til kostnaðar nemur 352 milljónum evra.
Hyggst auka hlut sinn kanadísku hugbúnaðarfyrirtæki
Í júní síðastliðnum gekk Marel enn fremur frá samningum um kaup á 14,3 prósent hlut í kanadíska hugbúnaðarfyrirtækinu, Worximity Technology Inc. fyrir 2,5 milljónir Kanadadollara, eða 1,8 milljónir evra. Marel hyggst auka hlut sinn í 25 prósent á næstu tólf mánuðum fyrir 2,5 milljónir Kanadadollara.
„Worximity býður upp á greiningarlausnir og söfnun rauntímagagna í skýinu sem fara saman við Innova-framleiðsluhugbúnað Marel. Hjá félaginu starfa um 25 manns sem þjónusta yfir 200 viðskiptavini. Megináhersla félagsins er að þjónusta fyrirtæki sem starfa við vinnslu á kjöti, mjólkurafurðum og brauðmeti, og nota Worximity hugbúnaðinn við að nýta hráefni betur, minnka framleiðslutíma og auka afköst og gæði,“ segir í tilkynningunni.
Umrót á heimsmörkuðum
Þá segir jafnframt í tilkynningunni frá Marel að markaðsaðstæður hafi verið einstaklega góðar á síðustu árum en séu nú meira krefjandi í ljósi umróts á heimsmörkuðum. Marel búi að góðri dreifingu tekna á milli markaða og iðnaða í gegnum alþjóðlegt sölu- og þjónustunet sitt ásamt breiðu og framsæknu vöru- og þjónustuframboði.
Marel stefnir að 12 prósent meðalvexti árlega yfir tímabilið 2017 til 2026.
Gerir ráð fyrir að hagnaður á hlut vaxi hraðar en tekjur
Marel gerir ráð fyrir að almennur markaðsvöxtur nemi 4 til 6 prósent til lengri tíma. „Með sterkri markaðssókn og nýsköpun stefnir Marel að innri vexti umfram almennan markaðsvöxt. Gera má ráð fyrir að áframhaldandi traustur rekstur og sterkt sjóðstreymi geti stutt við 5 til 7 prósent ytri meðalvöxt á ári,“ segir í tilkynningunni.
Marel gerir ráð fyrir að hagnaður á hlut vaxi hraðar en tekjur. „Áætlaður vöxtur er háður hagsveiflum og þeim tækifærum sem eru í boði hverju sinni og því má gera ráð fyrir að hann verði því ekki línulegur. Reikna má með breytilegri afkomu á milli ársfjórðunga vegna efnahagsþróunar, sveifla í pöntunum og tímasetningu stærri verkefna.“
