Hlut­fall fyrstu kaup­enda af heild­ar­fjölda íbúða­kaup­enda var 27,7 pró­sent á öðrum árs­fjórð­ungi árs­ins. Það hefur aldrei verið hærra frá því að byrjað var að mæla hlut­fall þeirra. Til sam­an­burðar var hlut­fall fyrstu íbúð­ar­kaup­enda á sama árs­fjórð­ungi árið 2009 alls 7,9 pró­sent af öllum kaup­um. Þetta kemur fram í nýrri mán­að­ar­skýrslu Íbúða­lána­sjóðs sem birt var í morg­un.

Þar segir að þetta bendi til þess að nú sé auð­veld­ara en áður að safna fyrir íbúð og að athygli veki að mikil hækkun á fast­eigna­verði síð­ast­lið­inn ára­tug, þar sem það hefur rúm­lega tvö­fald­ast í krónum talið, hafi ekki haft áhrif á hlut­fall fyrstu kaup­enda á mark­að­in­um. 

Kaupsamningum fækk­aði hins vegar í heild á fyrri helm­ingi árs­ins miðað við sama tíma­bil í fyrra, alls um fjögur pró­sent. Þeim fjölg­aði um sama hlut­fall á höf­uð­borg­ar­svæð­inu, mest í Kópa­vogi (20 pró­sent) og í Reykja­vík (1,4 pró­sent). Í öðrum sveit­ar­fé­lögum á höf­uð­borg­ar­svæð­inu hefur hins vegar orðið sam­drátt­ur. Kaup­samn­ingum fækk­aði milli ára í Garðabæ um 37 pró­sent og um 31 pró­sent í Hafn­ar­firði og Mos­fells­bæ. 

Á Vest­fjörðum fjölg­aði kaup­samn­ingum um 30 pró­sent og um átta pró­sent í Reykja­nes­bæ. Í öðrum lands­hlutum mæld­ist fækk­un.

Með­al­sölu­tími íbúða á höf­uð­borg­ar­svæð­inu var 160 dagar á fyrri hluta árs­ins 2019, sem er jafn langur tími og á sama tíma­bili í fyrra.

Dregið hefur úr 12 mán­aða hækk­unum ásetts verðs íbúð­ar­hús­næðis á land­inu öllu, en það hefur hækkað meira utan höf­uð­borg­ar­svæð­is­ins en innan þess.