Um hálfur millj­arður gæti tap­ast í norð­lenskri ferða­þjón­ustu vegna gjald­þrots ferða­skrif­stof­unnar Super Break en unnið er að því að fá nýja aðila til að fljúga til Akur­eyrar í vetur þar sem nú þegar er búið að selja um helm­ing þeirra flug­sæta sem voru í boði. Frá þessu er greint í Frétta­blað­inu í morg­un.

Móð­ur­fé­lag bresku ferða­skrif­stof­unnar Super Break hefur verið tekið til gjald­þrota­skipta og starf­semi Super Break hætt, eins og greint var frá í byrjun þessa mán­að­ar. Félagið hóf að fljúga milli Bret­lands og Akur­eyrar vet­ur­inn 2017 til 2018 og áform­aði að halda flugi þangað áfram næsta vetur og bjóða upp á 14 bein flug.

Arn­heiður Jóhann­es­dótt­ir, fram­kvæmda­stjóri Mark­aðs­stofu Norð­ur­lands, segir í sam­tali við Frétta­blaðið þetta verða högg fyrir fyr­ir­tæki á svæð­inu. „Við reiknum með að þetta verði um 9.000 gistinætur sem gætu tap­ast í febr­úar og mars og vegna árs­tíða­sveiflna í ferða­þjón­ustu á Norð­ur­landi er um mikla veltu að ræða á þessum árs­tíma.“

Hún segir jafn­framt að búið hafi verið að leggja pen­inga í mark­aðs­setn­ing­una og séu þau að skoða að fá nýja aðila að borð­inu. „Við vorum að fara inn í þriðja árið með Super Break og því hefur komið ágætis reynsla á þetta flug.“

Arn­heiður von­ast hins vegar til að mark­aðs­setn­ingin hafi skilað sér til fleiri aðila og að önnur fyr­ir­tæki séu til í að stökkva á milli­landa­flug milli Akur­eyrar og meg­in­lands Evr­ópu eða Bret­landseyja.