Efna­hags­reikn­ingur Trygg­ing­ar­mið­stöðv­ar­innar (TM) tæp­lega tvö­fald­ast við kaup fyr­ir­tæk­is­ins á fjár­mögn­un­ar­fyr­ir­tæk­inu Lykli. Það hefur verið í eigu Klakka, áður Exista, en kaup TM á fyr­ir­tæk­inu, sem til­kynnt var um til kaup­hallar í dag, eru háð sam­þykki hlut­hafa­fund­ar, Sam­keppn­is­eft­ir­lits­ins og Fjár­mála­eft­ir­lits­ins. 

Kaupin eru umfangs­mik­il, en heild­ar­út­lán Lyk­ils nema 32,3 millj­örðum króna og heild­ar­eignir yfir 40 millj­örð­um. Til sam­an­burðar námu heild­ar­eignir TM 40,8 um mitt þetta ár.

Kaup­verðið er 9,25 millj­arðar króna, og gera áætl­anir ráð fyrir að með tím­anum geti hagn­aður á hlut auk­ist um 20 til 30 pró­sent.

Eigið fé Lyk­ils var 11,7 millj­arðar um mitt ár 2019, og því er kaup­verðið 0,79 sinnum eigið fé fyr­ir­tæk­is­ins. Hlut­fall kaup­verðs á móti áætl­uðu eigin fé í árs­lok 2019 er hins vegar 0,82 miðað við áætl­anir um afkomu Lyk­ils á árinu 2019, að því er kemur fram í til­kynn­ingu um kaup­in. 

Kaup­verðið verður greitt með hand­bæru fé og verður fjár­magnað með útgáfu á nýju hlutafé upp á þrjá millj­arða og sölu á eign­um. TM hefur tryggt sér láns­fjár­mögnun að fjár­hæð allt að þrjá millj­arða vegna við­skipt­anna til að við­halda sveigj­an­leika í stýr­ingu eigna­safns­ins, eins og það er orðað í til­kynn­ingu.

Kaupin á Lykli eru í sam­ræmi við stefnu TM og eft­ir­leiðis mun starf­semi félags­ins skipt­ast í þrjár jafn mik­il­vægar stoð­ir, vátrygg­ing­ar, fjár­mögnun og fjár­fest­ing­ar, að því er segir í til­kynn­ingu. „Tæki­færi eru til að bæta arð­semi af grunn­rekstri Lyk­ils. TM áætlar að hægt verði að ná fram tölu­verðum sam­legð­ar­á­hrif­um, bæði í tekjum og kostn­aði, fjölga fjár­mögn­un­ar­kostum og ná niður fjár­magns­kostn­aði. Þá er stefnt að því að gera fjár­magns­skipan hag­kvæm­ari,“ segir í til­kynn­ing­unni.

Með kaup­unum verður TM mun stærra félag en t.d. helstu sam­keppn­is­að­ilar á trygg­inga­mark­aði, VÍS og Sjó­vá. Heild­ar­eignir VÍS námu 52 millj­örðum um mitt þetta ár og eigið fé rúm­lega 15 millj­örð­um. Hjá Sjóvá eru heild­ar­eignir 51,8 millj­arðar og eigið fé 15,6 millj­arð­ar. 

Með kaupum TM á Lykli verður til félag með heild­ar­eignir yfir 80 millj­örðum króna, og fjár­mögnun - þ.e. útlán og leigu­samn­ingar - verður stór hluti starf­sem­inn­ar. Þannig má segja að kaup TM séu hluti af hag­ræð­ingu á fjár­mála- og trygg­ing­ar­mark­aði, þar sem fyr­ir­tæki stækka og sam­einast, til að auka arð­semi.

Mark­aðsvirði TM er nú 20,1 millj­arð­ar. Mark­aðsvirði Sjó­vár er 20,8 millj­arðar og VÍS 19,7 millj­arð­ar. Öll félögin eru skráð á aðal­l­ista kaup­hallar Íslands.