Icelandair hefur upp­fært áætlun sína um hvenær 737 Max vél­arnar frá Boeing gætu farið í loft­ið, og gerir áætlun félags­ins nú ekki ráð fyrir að þær kom­ist í loftið fyrr en eftir febr­úar mánuð á næsta ári. 

Fyrri áætl­un, sam­kvæmt til­kynn­ingu frá félag­inu til kaup­hall­ar, hafði gert ráð fyrir að kyrr­setn­ingu yrði aflétt í jan­ú­ar. 

Við­ræður milli Icelandair og Boeing, um bóta­greiðslur vegna þess fjár­tjóns sem Icelandair hefur orðið fyrir vegna kyrr­setn­ing­ar, eru í gangi, að því er segir í til­kynn­ingu Icelandair.

Frá því í mars á þessu ári hafa 737 Max vél­arnar frá Boeing verið kyrr­sett­ar, eftir að tvær vélar af þeirri gerð höfðu tog­ast niður til jarðar með þeim afleið­ingum að 346 létu­st, allir um borð í báðum vél­un­um. Slysin urðu í Indónesíu 29. októ­ber í fyrra og síðan 13. mars í Eþíóp­íu. 

Fyrstu nið­ur­stöður rann­sóknar slyss­ins í Indónesíu voru kynntar í vik­unni, og eru þær á þá leið að galli í MCAS kerfi í vél­un­um, sem á að sporna gegn ofrisi, hafi verið helsta orsök slyss­ins. 

Kyrr­setn­ing á vél­unum kemur harka­lega niður á rekstri Icelanda­ir, en félagið hefur tapað 11 millj­örðum á síð­ustu tveimur árs­fjórð­ung­um, og má rekja tapið að miklu leyti til kyrr­setn­ing­ar­inn­ar. 

Icelandair hafði upp­haf­lega gert ráð fyrir 9 vélum af Max gerð í flota sinn í vet­ur, en vegna kyrr­setn­ing­ar­innar hafa þær áætl­anir verið í upp­námi alveg frá því í mars og félagið þurft að leita leiða til að halda uppi þjón­ustu sinni með öðrum hætti og not­ast við aðrar vél­ar. 

Bogi Nils Boga­son, for­stjóri, hefur sagt að það hafi gengið vel hjá félag­inu að glíma við for­dæma­lausar aðstæð­ur, en að þær séu krefj­and­i. „Eins og við höfum áður sagt, teljum við ólík­legt að MAX vél­arnar verði komnar aftur í rekstur fyrir lok þessa árs. Við viljum hins vegar lág­marka áhrif á far­þega okkar og fram­lengja þetta tíma­bil með góðum fyr­ir­vara, enda gott svig­rúm hjá okkur á þessum árs­tíma að nýta aðrar vélar í flot­anum hjá okk­ur,“ segir Bogi Nils í til­kynn­ingu.

Mark­aðsvirði Icelandair hefur sveifl­ast mik­ið, en það hefur lækkað um tæp­lega 40 pró­sent á þessu ári, og er nú um 33 millj­arð­ar. Eigið fé félags­ins var um mitt þetta ár um 55 millj­arð­ar.