Sextán þingmenn úr fjórum flokkum hafa lagt fram þingsályktunartillögu sem gengur út á það að efnt skuli til þjóðaratkvæðagreiðslu um hvort flugvöllur og miðstöð innanlands- og sjúkraflugs skuli vera áfram í Vatnsmýrinni í Reykjavík.
Fyrsti flutningsmaður er Njáll Trausti Friðbertsson, þingmaður Sjálfstæðisflokksins. Með honum eru fimmtán þingmenn úr Sjálfstæðisflokknum, Framsókn, Miðflokknum og Vinstri grænum.
Eftirfarandi spurning verði borin upp í þjóðaratkvæðagreiðslunni: „Vilt þú að flugvöllur og miðstöð innanlands-, kennslu- og sjúkraflugs verði áfram í Vatnsmýrinni í Reykjavík uns annar jafngóður eða betri kostur er tilbúinn til notkunar?“
Í greinargerðinni með tillögunni kemur fram að sambærilegar tillögur hafi verið fluttar fjórum sinnum áður. „Lagt er til að fram fari þjóðaratkvæðagreiðsla um framtíð Reykjavíkurflugvallar. Með því fær þjóðin tækifæri til þess að segja hug sinn og hafa áhrif á það hvar flugvöllurinn og miðstöð innanlands- og sjúkraflugs verða í fyrirsjáanlegri framtíð, m.a. með tilliti til þjóðhagslegra hagsmuna.“
Jafnframt kemur fram að ríkir almannahagsmunir felist í greiðum samgöngum innan lands og staðsetning flugvallarins og miðstöðvar innanlandsflugs hafi afar mikla þýðingu í því samhengi. Flugvöllurinn gegni mjög mikilvægu öryggishlutverki fyrir almenning í landinu vegna sjúkra- og neyðarflugs, svo og sem varaflugvöllur. Þá gegni flugvöllurinn mjög mikilvægu hlutverki í almannavarnakerfi landsins.
Staðsetning flugvallarins umdeild
Þá segir að staðsetning flugvallarins hafi verið umdeild í nokkurn tíma. Í kjölfar dóms Hæstaréttar frá 9. júní 2016 hafi íslenska ríkinu verið gert skylt að loka norðaustur-suðvestur-flugbraut Reykjavíkurflugvallar í samræmi við samkomulag þáverandi innanríkisráðherra og borgarstjórans í Reykjavík frá árinu 2013. Hafi umræddri flugbraut nú verið lokað.
„Eftir sem áður ríkir ekki einhugur um framtíðarstaðsetningu Reykjavíkurflugvallar og hlutverk hans sem samgöngumiðstöðvar til framtíðar, en aðalskipulag Reykjavíkur gerir ráð fyrir því að flugvöllurinn víki í áföngum eftir árið 2022. Fyrir liggur að flugvöllurinn lokast í reynd þegar norður-suður-brautinni verður lokað sem Reykjavíkurborg stefnir að 2022,“ segir í greinargerðinni.
Í því sambandi þurfi einnig að horfa til þess að í samgönguáætlun fyrir árin 2011 til 2022 sé gert ráð fyrir því að flugvöllur verði í Reykjavík til ársins 2022 hið minnsta þótt ekki sé með skýrum hætti kveðið á um staðsetningu hans. Þá sé í samgönguáætlun fyrir árin 2019 til 2033 miðað við að Reykjavíkurflugvöllur geti áfram þjónað innanlandsflugi á fullnægjandi hátt á meðan annar jafn góður eða betri kostur sé ekki fyrir hendi. „Við meðferð málsins kom fram að 15 til 20 ár tæki að byggja upp nýjan flugvöll á öðrum stað. Það er því afar brýnt að þjóðin fái tækifæri til þess að segja hug sinn varðandi umrætt málefni og hafa þannig áhrif á endanlega niðurstöðu málsins sem gæti m.a. falist í tilfærslu á skipulagslegu ákvörðunarvaldi með lögum, að teknu tilliti til mikilvægra almannahagsmuna.“
