Á fjár­auka­lögum 2019 er lagt til að 40 millj­ónir króna verði veittar til Alþingis vegna „mik­illar við­veru starfs­manna Alþingis umfram almenna starfs­skyld­u.“ Ástæðan er sú að á vor­dögum hafi verið óvenju mikið ann­ríki á Alþingi sem kall­aði á mjög mikla við­veru starfs­manna skrif­stof­unnar umfram almenna vinnu­skyldu. „Alla jafna er mikið álag á vor­dögum þings­ins og gert ráð fyrir því í áætl­unum skrif­stof­unnar en á yfir­stand­andi ári var það óvenju mikið og varði vikum sam­an. Ástæð­urnar voru mál­þóf í þingsalnum og mörg, umfangs­mikil og þung mál sem sinna þurfti á nefnda­svið­i.“

Þetta kemur fram í frum­varpi til fjár­auka­laga sem Bjarni Bene­dikts­son, fjár­mála- og efna­hags­ráð­herra, dreifði á Alþingi um helg­ina.

Þar segir að yfir­vinna starfs­manna Alþingis sem vinna í tengslum við þingsal­inn hafi verið tvö­falt meiri en vana­legt er og álíka mikið hjá nefnda­sviði. „Þá var ekki nægur fjöldi starfs­manna til að sinna allri þess­ari vinnu án þess að kæmi til hvíld­ar­tíma­brota sem einnig skap­aði auk­inn kostn­að. Þessar aðstæður voru ófyr­ir­sjá­an­legar og Alþingi á engan vara­sjóð til að bregð­ast við óvæntum kostn­aði upp á tugi millj­óna.“

Það mál­þóf sem vísað er í var stundað af þing­mönnum Mið­flokks­ins vegna inn­leið­ingu þriðja orku­pakka Evr­ópu­sam­bands­ins. Set var nýtt umræðu­met á Alþingi í umræðum um hann en þorri þeirra fór þannig fram að ein­ungis þing­menn Mið­flokks­ins fluttu ræð­ur, oft um miðjar næt­ur. 

Þegar málið var loks afgreitt, á sér­stökum þing­stubbi í sept­em­ber, höfðu umræður um þriðja orku­­pakk­ann staðið yfir í um 150 klukku­­stund­ir.