Skúi Mog­en­sen, stofn­andi, eig­andi og fyrr­ver­andi for­stjóri hins gjald­þrota flug­fé­lags WOW air, segir að það sé „llöngu orðið ljóst að það hefði verið mun hag­kvæm­ari fyrir ríkið að koma að björgun WOW heldur en að leyfa því að falla“.

Þetta segir hann í stöðu­upp­færslu á Face­book vegna birt­ingar á frum­varpi til fjár­auka­laga um helg­ina þar sem fram kemur að rík­is­sjóður muni verða rek­inn með tæp­lega 15 millj­arða króna halla á þessu ári. Stór ástæða þess er sú að gjald­þrot WOW air hefur leitt af sér mik­inn við­bót­ar­kostnað fyrir rík­is­sjóð vegna 6,3 millj­arða króna við­bót­ar­fram­lags til Atvinnu­trygg­inga­sjóðs vegna auk­ins atvinnu­leysis og tæp­lega 1,3 millj­arðar króna fram­lags til Ábyrgð­ar­sjóðs launa til að mæta auknum útgreiðslum vegna gjald­þrota fyr­ir­tækja á árinu.

 

Skúli segir að það hafi þegar verið búið að end­ur­skipu­leggja rekstur WOW air og koma honum í sama horf og þegar best lét á árunum 2015/6. „Ríkið hefði hæg­lega getað gripið inní líkt og Þjóð­verjar gerðu með Air­Berlin á meðan verið væri að tryggja lang­tíma fjár­mögnun félags­ins. 

WOW skil­aði rík­inu beint og óbeint tugum millj­arða í rík­is­sjóð und­an­farin ár svo ekki sé talað um heildar áhrifin sem WOW hafði á svo til alla verzlun og þjón­ustu í land­inu. Það var hörmu­legt að horfa á WOW falla og allt okkar frá­bæra fólk missa vinn­una. Svo það sé sagt þá er ég ekki að kenna rík­inu um hvernig fór né að draga úr minni ábyrgð heldur aðeins að benda á þá stað­reynd að það hefði verið mun skyn­sam­legra að tryggja áfram­hald­andi rekstur WOW öllum til hags­bóta.“

Átti þrjár millj­ónir á reikn­ingi við þrot

16. ágúst, héldu skipta­stjórar þrota­bús WOW air, Sveinn Andri Sveins­son og Þor­steinn Ein­ars­son, fund með kröfu­höfum félags­ins. Þá lá fyrir að kröfum upp á 151 millj­arð króna hafði verið lýst í búið, þar af 138 millj­arða króna kröfum sem telj­ast almenn­ar. Eins og staðan var þá var 1,1 millj­arður króna á banka­reikn­ingum WOW air upp í þær kröf­ur. Það þýddi að 0,7 pró­sent var til upp í lýstar kröf­ur, sem þó á eftir að taka afstöðu til hvort að verði við­ur­kenndar eða ekki.

Í skýrslu skipta­stjór­anna va farið yfir hver raun­veru­leg staða mála var hjá WOW air þegar skellt var í lás með hvelli í lok mars. Þar var meðal ann­ars opin­berað að við gjald­þrot félags­ins hafi verið um þrjár millj­ónir króna lausar til ráð­stöf­unar á banka­reikn­ingum WOW sam­stæð­unn­ar. Til að setja þá tölu í sam­hengi má benda á að við gjald­þrot störf­uðu alls 963 manns hjá WOW air. Lausafé sam­stæð­unnar hefði ekki dugað til að greiða nema örfáum þeirra sem þar störf­uðu laun í byrjun apríl 2019. 

Þar var sú nið­ur­staða sett fram að WOW air hafi verið ógjald­fært í síð­asta lagi um mitt ár 2018. Það þýðir að WOW air gat ekki greitt gjald­fallnar skuldir sínar en hefur samt sem áður ekki verið úrskurð­aður gjald­þrota. Í skýrslu skipta­stjór­anna sagði að þeir telji „óhjá­kvæmi­legt að fram fari nán­ari grein­ing á því hvenær WOW var sann­ar­lega ógjald­fært.“