Ríkisframlög til Samfylkingarinnar nær fjórfölduðust á milli ára. Framlögin hækkuðu úr um 23 milljónum króna árið 2017 í 88,8 milljónir árið 2018. Í heildina voru tekjur Samfylkingarinnar 148,7 milljónir í fyrra. Þetta er á meðal þess sem fram kemur í útdrætti úr ársreikningi Samfylkingarinnar sem Ríkisendurskoðun birti í dag.
Samfylkingin fékk 12,1 prósent atkvæða í kosningunum í október 2017 og sjö þingmenn kjörna. Flokkurinn hafði fengið 5,7 prósent atkvæða og þrjá þingmenn í kosningunum sem haldnar voru árið áður.
Þessa miklu aukningu í ríkisframlögum má því annars vegar rekja til aukins fylgi flokksins í kosningunum 2017 og hins vegar til þess að árið 2018 var fyrsta árið í rekstri þeirra stjórnmálaflokka sem eiga fulltrúa á þingi frá því að framlög til þeirra úr ríkissjóði voru hækkuð um 127 prósent, að tillögu sex flokka sem sæti eiga á Alþingi.
Framlög úr ríkissjóði til flokkanna átta á þingi áttu að vera 286 milljónir króna í fyrra en urðu 648 milljónir króna eftir að sú ákvörðun var tekin. Þegar kosið verður næst, árið 2021, munu flokkarnir átta sem náðu inn á þing í haustkosningunum 2017 verða búnir að fá alls úthlutað rúmlega 2,8 milljörðum króna úr ríkissjóði vegna áranna 2018-2021 til að standa straum af starfsemi sinni.
Níu einstaklingar gáfu Samfylkingunni hámarksfjárhæð
Í ársreikningunum má jafnframt sjá að rekstur Samfylkingarinnar kostaði 126,4 milljónir í fyrra og skilaði reksturinn því 17 milljóna króna hagnaði. Flokkurinn skuldaði alls 101,4 milljónir í fyrra og lækkuðu skuldir hans milli ára úr 114,4 milljónum króna.
Alls fékk Samfylkingin 3,5 milljónir frá lögaðilum, þar af gáfu þrír lögaðilar flokknum hámarksfjárhæð í framlag sem lög heimili á síðasta ári, eða 400 þúsund krónur. Það voru Síminn hf., Sigfúsarsjóður, og Alþýðuhús Reykjavíkur ehf.
Þá voru níu einstaklingar sem gáfu flokknum 400 þúsund krónur. Alls fékk flokkurinn 23,6 milljónir í framlög frá einstaklingum þar með talið eru framlög sem innheimtust með sérstöku sóknarátaki sem eru talin með framlögum einstaklingum í stað þess að telja þau með öðrum rekstrartekjum.
Ný lög samþykkt í fyrra
Ný lög um fjármál stjórnmálaflokka voru samþykkt á Alþingi í desember í fyrra. Á meðal breytinga sem þau lög fela í sér eru að stjórnmálaflokkar mega nú taka á móti hærri framlögum frá fyrirtækjum og einstaklingum. Hámarksframlagið var 400 þúsund krónur en var hækkað í 550 þúsund krónur.
Auk þess var sú fjárhæð sem einstaklingur þarf að gefa til að vera nafngreindur í ársreikningum viðkomandi flokka eða frambjóðenda hækkuð úr 200 þúsund krónum í 300 þúsund krónur.
Hugtakið „tengdir aðilar“ var líka samræmt, en Ríkisendurskoðun gerði í fyrra athugasemdir við umframframlög aðila sem voru gefin í gegnum nokkur mismunandi félög í eigu sömu aðila.
Þá var ákveðið að láta stjórnmálaflokkanna skila ársreikningum sínum til ríkisendurskoðanda fyrir 1. nóvember ár hvert í stað 1. október líkt og nú er. Sú grundvallarbreyting fylgdi með að Ríkisendurskoðun mun hætta að birta takmarkaðar upplýsingar úr reikningum flokkanna, svokallaðan útdrátt, og birtir þess í stað ársreikninganna í heild sinni áritaða af endurskoðendum.
Þessi breyting á hins vegar ekki að taka gildi fyrr en á næsta ári, þrátt fyrir að nýju lögin séu þegar komin í gagnið.
