For­seti Namib­íu, Hage Gein­gob, beindi spjótum sínum að Íslandi og Sam­herja í ræðu sem hann hélt fyrir stuðn­ings­menn SWA­PO-­flokks­ins, helsta valda­flokks Namib­íu, í dag. 

„Hvaðan koma pen­ing­arn­ir? Þeir koma frá Ísland­i,“ sagði Gein­gob, og bað fólk um að hugsa frekar um þá sem greiddu mútur og stund­uðu spillta við­skipta­hætti, Íslend­inga og íslensk fyr­ir­tæki, sem vanda­mál, frekar en stjórn­kerfi Namib­íu. 

Í umfjöllun The Namibian, fjöl­mið­ils sem hefur fjallað ítar­lega um Sam­herj­a­mál­ið, segir að Gein­gob hafi sagt fjöl­miðla hafa ein­blínt of mikið á stjórn­völd í Namib­íu, frá því að Sam­herj­a­málið kom upp með þætti Kveiks á RÚV, umfjöll­unar Stund­ar­inn­ar, Al Jazeera og Wiki­leaks. 

Um 30 þús­und skjöl sem tengd eru Sam­herja hafa verið birt í tengslum við mál­ið, á vef Wiki­leaks, en bókin Ekk­ert að fela, eftir Helga Selj­an, Aðal­stein Kjart­ans­son og Stefán Drengs­son, byggir að stóru leyti á upp­lýs­ingum úr gögn­un­um, auk við­bótar rann­sókn­ar­vinnu höf­unda. 

Bern­hard Esau, fyrr­ver­andi sjáv­ar­út­vegs­ráð­herra Namib­íu, var hand­tek­inn í gær í tengslum við rann­sókn á spill­ingu og og ætl­uðum mútu­greiðslum í namibískum sjáv­ar­út­vegi, meðal ann­ars frá Sam­herja, að því er fram kom í umfjöllun The Namibi­an.

Einnig var kaup­sýslu­mað­ur­inn Ricardo Gustavo hand­tek­inn en hann var sam­starfs­maður James Hatuikulipi, sem er einn þeirra sem kall­aðir hafa verið hákarl­arnir í fréttum af starfs­háttum Sam­herja í Namib­íu.

Paulus Noa, fram­kvæmda­stjóri ACC, spill­ing­ar­lög­regl­unnar í Namib­íu, stað­festir í sam­tali við frétta­stofu RÚV, að þre­menn­inga sé nú leitað og að það séu þeir sem voru kall­aðir hákarl­arnir í umfjöllun frétta­skýr­inga­þátt­ar­ins Kveiks um Sam­herj­a­skjöl­in; Sacky Shang­hala, fyrr­ver­andi dóms­mála­ráð­herra lands­ins, James Hatuikulipi og frændi hans Tam­son Fitty Hatuikulipi, sem gegndu fram­kvæmda­stjóra­stöðum hjá Investec Asset Mana­gement. Sá síð­ar­nefndi er tengda­sonur sjáv­ar­út­vegs­ráð­herr­ans fyrr­ver­andi, eins og fram kom í Kveik­i. 

Hér­aðs­sak­sókn­ari, Fjár­mála­eft­ir­litið og skatta­yf­ir­völd á Íslandi, eru öll að rann­saka við­skipta­hætti Sam­herja í Namib­íu. Þá eru yfir­völd í Nor­egi einnig að rann­saka ásak­anir um skatt­svik og pen­inga­þvætti, í tengslum við við­skipti Sam­herja í Afr­íku.

Í Namibíu búa 2,5 millj­ónir manna, en árleg lands­fram­leiðsla nemur um 1.700 millj­örðum króna. Til sam­an­burðar eru íbúar á Íslandi um 360 þús­und, en árleg lands­fram­leiðsla á Íslandi var um 2.800 millj­arðar króna í fyrra, þrátt fyrir að íbúa­fjöld­inn á Íslandi sé aðeins um 14,4 pró­sent af íbúa­fjölda Namib­íu.