Arion banki þarf að greiða 21 milljón í sekt, í tengslum við sátt sem bankinn hefur gert við FME. Eftirlitið tilkynnti Arion banka í apríl 2018 að það hefði til skoðunar meðferð bankans á hagsmunaárekstrum í tengslum við aðkomu bankans að fjármögnun kísilverksmiðju United Silicon í Helguvík.
Þeirri skoðun er nú lokið með sátt þar sem Arion banki viðurkennir að láðst hafi að skrá með skipulegum og formlegum hætti innan bankans greiningu hagsmunaárekstra í tengslum við kaup lífeyrissjóða á skuldabréfum á árinu 2015 og þátttöku þeirra í hlutafjárhækkunum Sameinaðs Sílikons hf. á árunum 2016 og 2017.
Heimilt er að ljúka málum sem þessum með sátt, enda er ekki um að ræða meiri háttar brot og fellst Arion banki á að greiða sekt að fjárhæð 21 milljón króna.
Í tilkynningu frá bankanum segir að Arion banki hafi gegnt fjölþættu hlutverki við öflun fjármagns til uppbyggingar verksmiðju United Silicon í Helguvík sem „óhjákvæmilega fól í sér hagsmunaárekstra“.
Bankinn upplýsti viðskiptavini sína um þessi tengsl og gætti þess að til staðar væru viðeigandi mótvægisaðgerðir til að koma í veg fyrir að hagsmunaárekstrar myndu skaða hagsmuni viðskiptavina. „Hvorki voru gerðar athugasemdir við greiningu hagsmunaárekstra né mótvægisaðgerðir bankans en líkt og segir í sáttinni, láðist að skjala greiningu á hagsmunaárekstrum og hefur bankinn þegar brugðist við þessari yfirsjón og bætt innri skráningu hagsmunaárekstra,“ segir í tilkynningu Arion banka.
Óhætt er að segja að United Silicon verkefnið hafi endað með ósköpunum, en félagið fór í þrot, og vinnur Arion banki nú að því að gera sér mat úr því sem eftir sat. Milljarðahagsmunir eru í húfi fyrir Arion banka, en óljóst er enn hvernig málinu lýkur, en erfið skilyrði hafa verið á markaði með kísil vegna falls á heimsmarkaðsverði.
