Kvika banki ætlar að hagn­ast um 2,3 til 2,7 millj­arða króna á árinu 2020. Af­komu­á­ætlun Kviku banka fyrir árið 2019 gerir ráð fyrir að hagn­aður á því ári hafi verið á bil­inu 2,5 til 2,8 millj­arðar króna fyrir skatta. Því má ætla að rekstur bank­ans verði á svip­uðu róli í ár og hann var í fyrra. Vert er að taka fram að í upp­hafi árs 2019 var afkomu­spá bank­ans tæpir tveir millj­arðar króna fyrir skatta en var breytt þrisvar á árinu, sam­an­lagt til umtals­verðrar hækk­un­ar.

Sam­kvæmt sam­þykktri rekstr­ar­á­ætlun stjórnar bank­ans fyrir árið mun arð­semi eigin fjár hans verða á bil­inu 15 til 18 pró­sent fyrir skatta, sem er umfram lang­tíma­mark­mið Kviku banka, en það er 15 pró­sent. Þetta er minni arð­semi en var á eigin fé Kviku banka á fyrst níu mán­uðum síð­asta árs þegar hún var 20,3 pró­sent. 

Þetta kemur fram í til­kynn­ingu til Kaup­hallar Íslands. 

Ársreikningur Kviku fyrir árið 2019 hefur ekki verið birtur en mun verða gerður opin­ber 27. febr­úar næst­kom­andi. Stóru við­skipta­bank­arnir þrír munu birta sína árs­reikn­inga í vik­unum á und­an. Arð­­semi eig­in­fjár er mun hærri hjá Kviku en hjá Arion banka, Íslands­­­banka og Lands­­bank­an­um, þar sem hún hefur verið á bil­inu tvö til sjö pró­­sent, und­an­farin mis­s­eri. Nýleg afkomu­við­vörun Arion banka vegna síð­asta árs bendir til þess að arð­semi hans hafi verið undir einu pró­senti í fyrra.

Eigna­stýr­ing ráð­andi tekju­straumur

Áætl­unin gerir ráð fyrir því að hreinar þókn­ana­tekjur verði 65 pró­sent af rekstr­ar­tekjum bank­ans í ár. Rúmur helm­ingur þeirra tekna eiga að falla til vegna eigna­stýr­ing­ar, en Kvika banki hefur verið dug­legur að kaupa upp eigna­stýr­ing­ar­fyr­ir­tæki und­an­farin miss­eri, meðal ann­ars Virð­ingu, Júpíter og GAMMA. Heild­ar­eignir í stýr­ingu hjá Kviku í lok sept­em­ber 2019 voru 417 millj­arðar króna.

Hreinar vaxta­tekjur bank­ans eru áætl­aðar 27 pró­sent og aðrar óskil­greindar tekjur eiga að nema átta pró­sent af rekstr­ar­tekj­um.

Sam­kvæmt áætlun stjórnar Kviku banka á bank­inn  eiga 101 millj­arð króna í lok árs. Það eru minni eignir en hann átti í lok þriðja árs­fjórð­ungs síð­asta árs, þegar heild­ar­eignir Kviku banka voru 112,6 millj­arðar króna. 

Stærstu eig­endur Kviku eru Líf­eyr­is­sjóður verzl­un­ar­manna með 8,77 pró­sent, Arion banki heldur á 6,93 pró­sent hlut og K2B fjár­fest­ing­ar, félag í eigu Svan­hildar Nönnu Vig­fús­dótt­ur, á 6,69 pró­sent hlut.