Icelandair tap­aði 7,1 millj­arði í fyrra, sam­an­borið við 6,8 millj­arða tap árið 2018. Á síð­ustu tveimur árum hefur tapið því verið tæp­lega 14 millj­arðar króna. 

Í til­kynn­ingu til kaup­hallar segir Bogi Nils Boga­son, for­stjóri Icelanda­ir, að kyrr­setn­ingin á 737 Max vélum Boeing - sem hefur verið í gildi frá því í lok mars í fyrra á alþjóða­vett­vangi - hafi haft for­dæma­laus áhrif á starf­semi félags­ins. Upp­gjörið sé í sam­ræmi við áætl­anir og vænt­ingar stjórn­enda félags­ins.

„Árið í heild var krefj­andi þar sem kyrr­setn­ing MAX véla hafði for­dæma­laus áhrif á rekstur Icelandair með töp­uðum tekj­um, auknum kostn­aði og tak­mörk­unum í nýt­ingu áhafna og flota félags­ins. Með áherslu á aukna arð­semi leiða­kerf­is­ins og hag­ræð­ingu í rekstri náð­ist tölu­verður bati í und­ir­liggj­andi rekstri. Styrkur og sveigj­an­leiki leiða­kerf­is­ins gerði það að verkum að félagið gat aðlagað leiða­kerfið hratt og örugg­lega að breyttum mark­aðs­að­stæð­um. Aukn­ing á fjölda far­þega til Íslands um 25% á árinu, þrátt fyrir kyrr­setn­ingu MAX vél­anna, ber þess merki. Félagið náði með þessum aðgerðum að mæta auk­inni eft­ir­spurn og tryggja sæta­fram­boð til og frá Íslandi og styðja þannig við íslenska ferða­þjón­ust­u,“ segir Bogi Nils í til­kynn­ing­u. 

Ekki liggur fyrir enn hvenær kyrr­setn­ing­unni verður aflétt, en Boeing er nú til rann­sókn­ar, meðal ann­ars hjá alrík­is­lög­regl­unni FBI, vegna slysanna sem urðu í Indónesíu 29. októ­ber 2018 og 13. mars í fyrra í Eþíóp­íu. Sam­tals létus 346 í þeim, allir um borð í báðum vél­um, en allt bendir til þess að gallar í vél­unum hafi verið meg­in­or­sök slysanna.

Mark­aðsvirði Icelandair er nú 44,5 millj­arðar króna, en eigið fé félags­ins nam tæp­lega 60 millj­örðum í lok árs­ins.