Í ljósi þeirra aðgerða sem gripið hefur verið til um allan heim vegna útbreiðslu COVID-19 veirunnar, er eftirspurn eftir ferðalögum á ákveðin svæði í heiminum nú þegar að dragast saman. Of snemmt er að segja til um möguleg áhrif þessarar þróunar á starfsemi Icelandair Group en þessi staða skapar aukna óvissu þegar kemur að áætlaðri rekstrarniðurstöðu félagsins fyrir árið 2020.
Þetta kemur fram í tilkynningu frá Icelandair Group í dag vegna útbreiðslu COVID-19 veirunnar.
„Vegna þessarar óvissu er afkomuspá Icelandair Group fyrir árið 2020 sem félagið gaf út á markaðinn þann 6. febrúar sl. ekki lengur í gildi og telja stjórnendur félagsins ekki mögulegt að gefa út áreiðanlega afkomuspá á þessum tímapunkti,“ segir í tilkynningunni.
Útbreiðsla veirunnar farin að hafa áhrif
Bogi Nils Bogason, forstjóri Icelandair Group, segir í tilkynningunni að útbreiðsla COVID-19 veirunnar og viðbrögð við henni séu að hafa áhrif á ferðahegðun á markaðssvæði þeirra.
„Vegna þess erum við að greina hugsanlegar sviðsmyndir og móta aðgerðir til að draga úr þeim áhrifum sem þessi þróun kann að hafa á starfsemi félagsins. Öll áhersla verður lögð á að lágmarka áhrif á viðskiptavini okkar en ef mótvægisaðgerðir koma til með að hafa áhrif á flugáætlun, munum við upplýsa um það um leið og slíkar ákvarðanir liggja fyrir. Ég legg áherslu á að öryggi og velferð farþega og starfsfólks okkar er ávallt í fyrirrúmi,“ segir hann.
Í reglulegum samskiptum við sóttvarnarlækni og Landlæknisembættið
Í tilkynningunni segir enn fremur að Icelandair hafi gripið til ýmissa ráðstafana og aukið viðbragðsgetu innan félagsins til að bregðast við vegna útbreiðslu COVID-19 veirunnar. Félagið fylgist grannt með þróun mála, sé í reglulegum samskiptum við sóttvarnarlækni og Landlæknisembættið og fylgi leiðbeiningum og verkferlum embættisins á hverjum tíma.
Einnig sé félagið sem fyrr í nánu samstarfi við Medaire, sem er alþjóðleg læknaþjónusta sem sérhæfir sig í lækningum og forvörnum um borð í flugvélum og veitir ráðgjöf í rauntíma þegar veikindi koma upp og ef grunur kæmi upp um smit um borð. Þá fái áhafnarmeðlimir viðamikla þjálfun sem meðal annars felur í sér viðbrögð við smitsjúkdómum.
Samkvæmt félagðinu er áhersla lögð á reglulega upplýsingagjöf til áhafna og farþega sem og aukna vöktun. Einnig hafi félagið farið yfir og eftir tilvikum uppfært verkferla og viðbragðsáætlanir í samvinnu við viðbragðsaðila hér á landi. Þá hafi verið gripið til varúðarráðstafana með viðbótarbúnaði um borð í flugvélum Icelandair, svo sem sótthreinsiefni, andlitsgrímum og hönskum.
