Icelandair ehf. og Flug­virkja­fé­lag Íslands hafa und­ir­ritað nýjan kjara­samn­ing á milli félag­anna fyrir tíma­bilið 1. jan­úar 2021 til 31. des­em­ber 2025. Þetta kemur fram í til­kynn­ingu frá Icelandair í dag.

„Samn­ing­ur­inn er í sam­ræmi við þau mark­mið sem samn­ings­að­ilar lögðu upp með sem í senn styrkir sam­keppn­is­hæfni félags­ins og stendur vörð um starfs­kjör og gott starfs­um­hverfi. FVFÍ mun nú leggja samn­ing­inn fyrir félags­menn sína til atkvæða­greiðslu,“ segir í til­kynn­ing­unni.

Þá kemur fram að kór­ónu­veiru­far­ald­ur­inn og afleið­ingar hans hafi haft gríð­ar­leg áhrif á starf­semi Icelanda­ir. Mikil óvissa sé um hvenær ferða­tak­mörk­unum verði aflétt og eft­ir­spurn eftir flugi og ferða­lögum taki við sér á ný. Félagið hafi þurft að grípa til erf­iðra en nauð­syn­legra aðgerða til að bregð­ast við óviss­unni. Á sama tíma sé unnið að því að styrkja sam­keppn­is­hæfni félags­ins til lengri tíma.

Bogi Nils Boga­son, for­stjóri Icelanda­ir, segir í til­kynn­ing­unni það vera ánægju­legt og mik­il­vægt að hafa und­ir­ritað lang­tíma­samn­ing við eitt af lyk­il­stétt­ar­fé­lögum þeirra. „Við­ræð­urnar voru lausn­a­mið­aðar allt frá upp­hafi enda hafa aðstæður í umhverfi flug­fé­laga aldrei verið meira krefj­andi en nú. Við stóðum frammi fyrir ýmsum áskor­unum sem við unnum að í sam­ein­ingu að leiða til lykta. Þetta er mik­il­vægt skref í að styrkja stöðu félags­ins og sam­keppn­is­hæfni á alþjóða­mark­aði svo við verðum í stakk búin til að sækja fram af krafti þegar óviss­unni lýkur og til fram­tíð­ar.“

Guð­mundur Úlfar Jóns­son, for­maður Flug­virkja­fé­lags Íslands, seg­ist telja að samn­inga­nefnd Flug­virkja­fé­lags Íslands hafi mætt þeim þörfum og mark­miðum sem Icelandair telji að þurfi að upp­fylla í því ástandi sem rík­ir. „Und­ir­ritun á samn­ingi er lausn fyrir báða aðila í þeirri stöðu. Við lögðum áherslu á að kjara­samn­ings­bundin gildi flug­virkja yrðu varð­veitt þannig að sátt væri um stöðu mála.“