Frá byrjun árs 2015 og fram til dags­ins í dag hafa þing­menn beint alls 358 fyr­ir­spurnum til atvinnu­vega- og nýsköp­un­ar­ráðu­neyt­is­ins, sem fer meðal ann­ars með mál­efni allra helstu atvinnu­vega íslensks sam­fé­lags. Fjöldi þeirra hefur auk­ist ár frá ári, en árið 2015 voru fyr­ir­spurn­irnar 36. Í fyrra voru þær hins vegar 94 og fjöldi þeirra því 160 pró­sent meiri. 

Flestar fyr­ir­spurn­irnar komu frá þing­mönnum Vinstri grænna, eða alls 25 pró­sent heild­ar­inn­ar. Píratar voru sá þing­flokkur sem spurði næst mest, en 18 pró­sent fyr­ir­spurn­anna voru frá þeim. Björn Leví Gunn­ars­son var með flestar fyr­ir­spurnir þing­manna flokks­ins, en ein af hverjum tíu fyr­ir­spurnum sem lagðar hafa verið fram á tíma­bil­inu komu frá hon­um. 

Mið­flokk­ur­inn, sem hefur ein­ungis setið á þingi frá því síðla árs 2017, ber ábyrgð á 13 pró­sent af öllum fram­lögðum fyr­ir­spurn­um. Heild­ar­fjöldi fyr­ir­spurna sem þing­menn hans hafa lagt fram til ráðu­neyt­is­ins á þessu kjör­tíma­bili er 46. Það er einni fyr­ir­spurn færri en þing­menn Pírata hafa lagt fram á sama tíma. 

Þetta kemur fram í svari Krist­jáns Þórs Júl­í­us­sonar, sjáv­ar­út­vegs- og land­bún­að­ar­ráð­herra, um kostnað atvinnu­vega- og nýsköp­un­ar­ráðu­neyt­is­ins við skrif­leg svör við fyr­ir­spurn­um. Í svar­inu er ekki til­greint hver kostn­að­ur­inn við að svara fyr­ir­spurnum sé. Ekki sé haldið sér­stak­lega utan um um tíma­fjölda starfs­manna í tengslum við svör við fyr­ir­spurnum þing­manna og því ekki hægt að til­greina nákvæman kostnað vegna þessa „enda er litið svo á að þessi verk­efni séu hluti af þeim verk­efnum sem ráðu­neyt­inu beri að sinna.“

Samfylkingin bar ábyrgð á tíu pró­sent allra fyr­ir­spurna sem sendar voru til ráðu­neyt­is­ins frá 2015, Sjálf­stæð­is­flokk­ur­inn og Fram­sókn­ar­flokkur settu fram níu pró­sent þeirra hvor, Við­reisn sjö pró­sent og Flokkur flokks­ins sex pró­sent. Björt Fram­tíð, sem náði ekki inn á þing í síð­ustu kosn­ing­um, lagði fram eitt pró­sent fyr­ir­spurna á tíma­bil­inu á meðan að flokk­ur­inn átti full­trúa á Alþing­i. 

Beint að Pírötum sér­stak­lega

Svarið er til­komið vegna fyr­ir­spurnar frá Brynj­ari Níels­syni, þing­manni Sjálf­stæð­is­flokks­ins. Brynjar vildi vita hversu margir starfs­menn kæmu að því að und­ir­búa svör við fyr­ir­spurnum þing­manna og hver áætl­aður heild­ar­fjöldi vinnu­stunda við að væri síð­ast­liðin fimm ár. Hann vildi líka fá sér­tæk­ari svör varð­andi heild­ar­kostnað ráðu­neyta við skrif­leg svör við fyr­ir­spurnum frá þing­flokki Pírata á yfir­stand­andi lög­gjaf­ar­þingi og hversu margar vinnu­stundir starfs­manna hafa farið í að svara þeim. Þá óskaði Brynjar eftir að fá upp­lýs­ingar um hvað fyr­ir­spurnir til skrif­legs svars frá hverjum þing­manni í þing­flokki Pírata væru hátt hlut­fall slíkra fyr­ir­spurna til ráð­herra.

Gengið hefur verið út frá því að fyr­ir­spurn­inni sé sér­stak­lega beint að Birni Leví, sem hefur lagt fram flestar fyr­ir­spurnir allra þing­manna á und­an­förnum þing­um. Þór­hildur Sunna Ævars­dótt­ir, þing­flokks­for­maður Pírata, sagði í kjöl­far fram­lagn­ingar henni, í stöðu­upp­færslu á Face­book, eft­ir­far­andi: „Brynjar Níels­son sem lagt hefur fram heilt eitt frum­varp og eina fyr­ir­spurn að eigin frum­kvæði, bjó til 10 fyr­ir­spurnir til þess að kvarta yfir því hvernig Björn Leví Gunn­ars­son vinnur vinn­una sína. Lat­asti þing­mað­ur­inn kvartar yfir vinnu­semi kollega síns. You can´t make this shit up.“ 

Brynjar tjáði sig um við­brögð Pírata við fyr­ir­spurn­inni skömmu síðar á sama vett­vangi og skrif­aði: „Nú ráfa vinir mínir úr gagns­lausa flokknum eins og haus­lausar hænur um allt netið til að hefna sín á kall­in­um, sem vog­aði sér að spyrja hvað gagns­lausar fyr­ir­spurnir þeirra kost­uðu skatt­greið­end­ur. Helst er ég sak­aður um leti og hafa verið í tölv­unni í þingsaln­um. Ef það er leti að trufla ekki vinn­andi fólk með þýð­ing­ar­lausum fyr­ir­spurnum játa ég sök. Sjálfum finnst mér það vera merki um leti að heimta að aðrir afli upp­lýs­inga sem hægt er að sækja sjálfur að mestu. En að fara í tölv­una endrum og eins undir óskilj­an­legum og drep­leið­in­legum ræðum er að lækn­is­ráði til að draga úr líkum á að maður reyni að hengja sig í gard­ín­unni í beinni útsend­ing­u.“