Þing­menn Mið­flokks­ins hættu að ræða um sam­göngu­á­ætl­anir Alþingis í hádeg­inu í dag, eftir að hafa dögum saman haldið uppi umræð­um, aðal­lega sín á milli, um ókosti Borg­ar­línu og aðra þætti í sam­göngu­á­ætl­un­unum sem flokk­ur­inn er ekki ánægður með.

„Enn er margt órætt í þessu máli, en í trausti þess að vilji sé til að ráð­ast í ákveðnar úrbætur höfum við ákveðið að sýna við­leitni með því að halda aðeins fjórar ræður í við­bót, þótt það þýði að margar góðar ræður verði aldrei flutt­ar,“ sagði Sig­mundur Davíð Gunn­laugs­son for­maður Mið­flokks­ins í upp­hafi ræðu sinnar í dag.

Síðan stigu þeir Karl Gauti Hjalta­son, Birgir Þór­ar­ins­son og Berg­þór Óla­son í pontu og fluttu ræður þar sem þeir fundu borg­ar­línu­verk­efn­inu allt til for­áttu, eins og þeir og aðrir þing­menn flokks­ins hafa gert í ræðum sínum frá því í síð­ustu viku. 

Alls hafa málin tvö, þings­á­lykt­un­ar­til­lögur um fimm og tíu ára sam­göngu­á­ætl­anir Alþingis verið rædd í um það bil 43 klukku­stundir í annarri umræðu á Alþingi, en atkvæða­greiðslum um málin var frestað.

Borg­ar­lína áfram til umræðu

Sam­göngu­málin víkja þó ekki af dag­skrá þings­ins, því skömmu fyrir kl. 13 hófust umræður um frum­varp Bjarna Bene­dikts­sonar fjár­mála- og efna­hags­ráð­herra um heim­ild til þess að stofna opin­bert hluta­fé­lag um upp­bygg­ingu sam­göngu­inn­viða á höf­uð­borg­ar­svæð­inu, sem yrði í sam­eign rík­is­ins og sveit­ar­fé­lag­anna á höf­uð­borg­ar­svæð­in­u. 

Óljóst er hvernig umræðu um það mál mun vinda fram, en ljóst er að þing­menn Mið­flokks­ins munu ekki láta sig vanta í umræð­una, sem snýst í grunn­inn um Borg­ar­línu.